الماتى
اسەم الماتىنىڭ تۇرعىندارى قازاقستان حالقىنىڭ بىرلىگى كۇنىن ادەتتەگىدەي ەرەكشە كوڭىل-كۇيمەن قارسى الدى. مەرەكەلىك شارا قالا اكىمدىگىنىڭ الدىن الا جوسپارلاعان باعدارلاماسىنا ساي – ورتالىق مادەنيەت جانە دەمالىس ساياجايىنان باستاۋ الدى. اسىرەسە, ۇستەرىنە قىزىل-جاسىل كيىم كيىپ, ايرىقشا نۇرعا مالىنىپ, كوكتەمدەي قۇلپىرعان قازاقستاندىق ەتنوس وكىلدەرىنىڭ قۋانىشىندا شەك جوق. بۇگىن – قازاقستانداعى بارشا ۇلتتى ۇيىستىراتىن, اعايىننىڭ باسىن قوساتىن ايتۋلى مەيرام! جينالعاندار «شابىت» جازدىق تەاتر الاڭىن قاۋمالادى. قالا تۇرعىندارى مەن قوناقتارىن قالا اكىمىنىڭ ۋاقىتشا مىندەتىن ورىنداۋشى احمەتجان ەسىموۆ زور شابىتپەن قۇتتىقتادى.
ول ايتۋلى مەرەكەنىڭ كەشەگى پرەزيدەنت سايلاۋىمەن تۇسپا-تۇس كەلۋىن اتاپ ءوتىپ, الماتىلىقتارعا, ونىڭ كوپ ۇلت وكىلدەرىنە ساياسي ناۋقاندا بەلسەندىلىك كورسەتكەنى ءۇشىن العىسىن ءبىلدىردى.
– ءبىزدىڭ ارمانىمىز – ءبىر, ماقساتىمىز – جالعىز, ول – «ماڭگىلىك ەل!» – دەپ تۇيىندەدى رەسمي وكىل.
بۇدان سوڭ احمەتجان ەسىموۆ الماتىداعى ەتنومادەني ورتالىقتاردىڭ تاڭداۋلى وكىلدەرىنە پرەزيدەنت جارلىعىنا سايكەس «قازاقستان حالقى اسسامبلەياسىنا – 20 جىل» مەرەكەلىك مەدالىن سالتاناتتى جاعدايدا تابىس ەتتى.
بەلگىلى ونەر جۇلدىزى ناعيما ەسقاليەۆا ءان-شاشۋ شاشتى. بۇدان كەيىن ورىس, ۋكراين, ۇيعىر, كورەي, تاتار تىلدەرىندە ءان ايتىلدى. بۇل كەزدە دۋماندى كونتسەرت قالانىڭ بارلىق اكىمشىلىك اۋداندارىندا جالعاسىن تاپقان...
ادەتتەگى ءداستۇر بويىنشا الماتى اۋماعىندا سۋبۇرقاقتار ىسكە قوسىلدى. ونىڭ ەڭ مارتەبەلىسى – باس سۋبۇرقاق تۇڭعىش پرەزيدەنت ساياباعىندا كوككە شاپشىپ, اينالاعا قوڭىر سالقىن لەپپەن ءار بەرىپ تۇر.
بۇدان باسقا قالا ورتالىعىنداعى 9 سۋبۇرقاق تا ىسكە قوسىلدى. اكىمدىكتىڭ تابيعي رەسۋستار باسقارماسىنىڭ وكىلدەرى قالاداعى قالعان 46 سۋبۇرقاق مامىر ايىنىڭ سوڭىنا دەيىن تولىق قوسىلادى دەپ سەندىردى.
مامىردىڭ ءانى اياۋسىز توگىلىپ, جىرى شاشىلدى... بىرلىك مەرەكەسى حالىقتىق جاپپاي سەرۋەنگە ۇلاسىپ, شىرايلانا ءتۇستى.
تالعات ءسۇيىنباي,
«ەگەمەن قازاقستان».
اقتاۋ
50-گە تارتا ۇلت وكىلدەرىن قۇتتى توسىندە توعىستىرىپ, ولاردىڭ شات تۇرمىسىنىڭ بەسىگىنە اينالعان ماڭعىستاۋدا بىرلىك مەرەكەسىن اتاپ ءوتۋ 1 مامىردان بىرنەشە كۇن بۇرىن باستالدى. مەكتەپ, كوللەدج وقۋشىلارىنىڭ ەتنومادەني بىرلەستىكتەردىڭ وكىلدەرىمەن تاقىرىپتىق كەزدەسۋى, ەتنومادەني بىرلەستىكتەر اراسىندا «بەلسەندى وتباسى» وتباسىلىق سايىسى, تۇرىكمەنستان دەلەگاتسياسىنىڭ قاتىسۋىمەن حالىقارالىق «مەن بەيبىتشىلىكتى تاڭدايمىن» اتتى بالالار سۋرەتتەرى كورمەسى مەن بايقاۋى, سونداي-اق, اقتاۋ, جاڭاوزەن قالالارىندا «تاتۋلىق-دوستىقتىڭ كيەلى بەسىگى» اتتى تۇرىكمەنستان ونەر جۇلدىزدارى جانە ماڭعىستاۋ ونەرپازدارىنىڭ بىرلەسكەن كونتسەرتى, «ىنتىماعى جاراسقان تاۋەلسىز ەلىم» اتتى مەكتەپ وقۋشىلارى اراسىندا ۇلتتار دوستىعى بايقاۋى, «بىرلىگىمىز جاراسقان!» اتتى جاستار بايقاۋى, سۋرەتشى جاستاردىڭ سۋرەت كورمەسى, سپورتتىق جارىستار سىندى ونداعان شارالار وبلىستىڭ اۋدان-قالالارىندا وتكىزىلدى.
مەرەكە كۇنگى شارا اقتاۋ قالاسىنداعى پرەزيدەنت داڭعىلى بويىندا ورنالاسقان «ماڭگىلىك الاۋ» كەشەنىنەن اقتاۋ قالاسى اكىمدىگى الدىنداعى استانا الاڭىنا دەيىن مەرەكەلىك شەرۋمەن باستالدى. بارابانشىلاردىڭ باستاۋىمەن ساپ تۇزەگەن شەرۋشىلەردى الدىمەن ەتنومادەني بىرلەستىكتەر وكىلدەرى, «نۇر وتان» پارتياسى وكىلدەرى, مەملەكەتتىك قىزمەتكەرلەر, ش.ەسەنوۆ اتىنداعى كمتجيۋ ۇجىمى, مۇنايشىلار مەن «اقتاۋ حالىقارالىق تەڭىز-ساۋدا پورتى», «ماەك-قازاتومونەركاسىپ», «قازتەلەكوم», وزگە دە ونداعان ۇجىمدار جالعادى. دوستىق, بىرلىك, بەيبىتشىلىك تاقىرىبىنداعى ۇرانداردى كوتەرىپ, جالاۋلاتا اۋقىمدى 35 توپ بولىپ ءجۇرىپ وتكەن شەرۋگە قاتىسۋشىلار سانى 5 مىڭعا جۋىقتادى.
سالتاناتتى شارادا ماڭعىستاۋ وبلىسىنىڭ اكىمى اليك ايدارباەۆ ەلباسى ن.نازارباەۆتىڭ ۇلتتار اراسىنداعى دوستىقتىڭ قازاقستاندىق مودەلىن قالىپتاستىرۋ مەن دامىتۋداعى ەرەن ەڭبەگىنىڭ ناتيجەسىندە بىرنەشە ۇلتتىڭ وكىلدەرى تاۋەلسىز قازاقستاندى دامىتۋ جولىندا ءبىر جەڭنەن قول, ءبىر جاعادان باس شىعارا قىزمەت ەتىپ جاتقاندىعىن, كيەلى ماڭعىستاۋ وڭىرىندە بۇل ءداستۇردىڭ ءوز ساباقتاستىعىن تاۋىپ وتىرعاندىعىن ايتا كەلىپ, بارشا ماڭعىستاۋلىقتاردى بىرلىك مەرەكەسىمەن قۇتتىقتادى جانە بۇدان بىلاي دا دوستىق پەيىلدەن جاڭىلماي, ەل ءۇشىن بىرلەسە قىزمەت ەتە بەرۋگە شاقىردى.
شەرۋ سوڭى مەرەكەلىك كونتسەرتكە ۇلاستى. ءار ۇلتتىڭ كورمەلەرىمەن بىرگە مەرەكەلىك ساۋدا-ساتتىق جارمەڭكەسى ۇيىمداستىرىلدى. مەرەكە اقتاۋ قالاسىنداعى «اقتاۋ», «بايتەرەك», «استانا», «دوستىق» ساۋدا-ويىن-ساۋىق ورتالىقتارىندا ءارتۇرلى ويىن-ساۋىق شارالارىمەن جالعاسىن تاپتى.
گۇلايىم شىنتەمىرقىزى,
«ەگەمەن قازاقستان».
سۋرەتتى تۇسىرگەن
تالانت قۇسايىن.
اقتوبە
كوكتەمنىڭ كۇنى جەر-اناعا بار مەيىرىمىن توگىپ, شۋاعىن شاشىپ, ك ۇلىمدەپ-اق تۇر. رەداكتسيا تاپسىرماسىمەن ءبىز ەرتە وياندىق پا دەسەك, بىزدەن ەرتە تۇرعاندار بارشىلىق ەكەن. ابىلقايىر حان باتىر ەسكەرتكىشى الدىنداعى الاڭعا كۇن كوتەرىلمەي-اق قاراقۇرىم حالىق جينالىپ قالىپتى. بۇلار 1 مامىر – قازاقستان حالقىنىڭ بىرلىگى كۇنىنە وراي ۇيىمداستىرىلعان «سەنىڭ مارافونىڭ – سەنىڭ جەڭىسىڭ» اتتى مارافونعا قاتىسۋشىلار بولىپ شىقتى. قالانىڭ كاسىپورىندارى مەن ۇيىمدارىنان جانە جوعارى وقۋ ورىندارى مەن كوللەدجدەردەن, مەكتەپتەردەن بارلىعى 4,5 مىڭ ادام قاتىسقان مارافوندا ەرلەر – 21, ايەلدەر – 10, ال بۇقارالىق مارافونشىلار 3 شاقىرىمعا جۇگىرىپ ءوتىپ, قازاقستان رەسپۋبليكاسىنىڭ تۇڭعىش پرەزيدەنتى ن.نازارباەۆ اتىنداعى ورتالىق ساياباققا جينالدى.
مۇندا دا مەرەكە الدەقاشان باستالىپ كەتكەن. تۇرلەنىپ-تۇلەپ كەتكەن ساياباق ورتاسىنداعى ۇلكەن ساحنادان سان ۇلتتىڭ اۋەزدى ءۇنى اسقاقتايدى. شايداي اشىق اسپاننان مەيىرىم توگىلۋدە. مەرەكەگە جينالعان حالىق ءنوپىرى ءسات سايىن تولىعا تۇسۋدە. ساۋدا قاتارلارى دا سان بوياۋعا مالىنعانداي ادەمىلەنىپ كەتكەن. ساحنادا دوستىق پەن بىرلىكتىڭ بەلگىسىندەي شاڭىراق كوتەرىلىپ, ونىڭ استىنا جينالعان وبلىستاعى ەتنومادەني بىرلەستىكتەردىڭ ۇلتتىق كيىمدەرىن كيگەن ونەرپازدارى مەرەكەنىڭ ءسانى مەن سالتاناتىن ارتتىرىپ تۇر. 1 مامىر – قازاقستان حالقىنىڭ بىرلىگى كۇنى مەرەكەسىنىڭ سالتاناتتى اشىلۋىندا وبلىس اكىمىنىڭ ورىنباسارى سارا نۇرقاتوۆا قىسقاشا ءسوز سويلەپ, ەلىمىزدەگى ۇلتارالىق دوستىق پەن بىرلىكتىڭ تەرەڭنەن تامىر تارتاتىنىن, وعان ەلباسى ن.نازارباەۆ ۇستانعان سارابدال ساياساتتىڭ بەرىك ىرگەتاسىن قالاپ وتىرعانىن جەتكىزدى. سودان كەيىن ەلىمىزدەگى تاتۋلىق پەن تۇراقتىلىققا ەلەۋلى ۇلەس قوسىپ جۇرگەن ەتنومادەني بىرلەستىكتەر توراعالارى مەن مۇشەلەرىنە «قازاقستان حالقى اسسامبلەياسىنا – 20 جىل» مەرەكەلىك مەدالىن تاپسىردى.
مەرەكەلىك سالتانات بارىسىندا مارافون جەڭىمپازدارى ماراپاتتالىپ, ولارعا اقشالاي جانە ەسكەرتكىش سىيلىقتار تارسىرىلدى.
مەرەكەلىك شاراعا جينالعاندارعا «دوستىق» وبلىستىق جانە «قازاقستان دوستىقتىڭ مەكەنى» اتتى ايماقتىق فەستيۆالدارىنىڭ لاۋرەاتتارىنىڭ گالا-كونتسەرتى ۇسىنىلدى. وبلىس ورتالىعىنداعى الاڭدار مەن اللەيالاردا دا كوكتەم شۋاعىمەن شىرايلانعان مەرەكەلىك كوڭىل-كۇي جالعاسىن تاپتى.
ساتىبالدى ءساۋىرباي,
«ەگەمەن قازاقستان».
اتىراۋ
جىل سايىن اتىراۋدا قازاقستان حالقىنىڭ بىرلىگى كۇنى مەرەكەسىن يساتاي مەن ماحامبەت باتىرلار ەسكەرتكىشى بوي كوتەرگەن الاڭدا اتاپ وتەدى. بۇل جولى دا سولاي بولدى. جۇرتشىلىق ەرتەڭگىلىك اتالعان الاڭعا قاراي توپ-توبىمەن اعىلدى. ۇلتتىق كيىمدەرىن كيىپ, ءبىر-ءبىرىن قول الىسىپ, ءتوس قاعىستىرعان ءتۇرلى ەتنوس وكىلدەرى ءبىر-بىرىمەن ايتۋلى مەرەكەمەن قۇتتىقتاپ جاتتى. ايتقانداي, وڭىردە 17 ەتنومادەني بىرلەستىك وكىلدەرى تاتۋلىق پەن تۇراقتىلىقتى, دوستىق پەن بىرلىكتى نىعايتۋعا لايىقتى ۇلەسىن قوسىپ كەلەدى. الاڭعا جينالعان جۇرتشىلىقتى وبلىس اكىمى باقتىقوجا ىزمۇحامبەتوۆ قۇتتىقتاپ, ەل بىرلىگىنىڭ ماڭىزىنا كەڭىنەن توقتالدى. ءوڭىردىڭ ءبىر توپ سوعىس جانە ەڭبەك ارداگەرىنە مەملەكەتتىك ماراپاتتار تاپسىردى. سونىمەن بىرگە, ەل بىرلىگىن نىعايتۋ, بەيبىتشىلىك پەن كەلىسىمدى ساقتاۋ جانە رۋحاني مادەنيەتتى دامىتۋعا قوسقان ۇلەسى ءۇشىن «بىرلىك» التىن مەدالىنە «تاتۋلىك» تاتار-باشقۇرت ەتنومادەني بىرلەستىگىنىڭ جەتەكشىسى گۇلسينا بايكەنوۆا مەن «اليا» ەۆرەي ەتنومادەني بىرلەستىگىنىڭ جەتەكشىسى پاۆەل تكاچ يە بولدى.
– ءبىزدىڭ ەلىمىز تاۋەلسىزدىگىن العالى بەرى كوپتەگەن جەتىستىككە قول جەتكىزدى. قازىرگى تاڭدا الەۋمەتتىك-ەكونوميكالىق جاعدايىمىز جاقسارا ءتۇستى. ەلىمىزدەگى بارلىق ەتنوس وكىلدەرى ءبىر-بىرىمەن تاتۋ, ءوز ءتىلىن, مادەنيەتىن دامىتۋعا مۇمكىندىك الدى. سونىمەن بىرگە, ءبارى دە مەملەكەتتىك ءتىلدى قۇرمەتتەيدى. ەلدەگى تاتۋلىقتىڭ نىعايعانى بيىلعى پرەزيدەنت سايلاۋىندا جانە ءبىر رەت دالەلدەندى, – دەيدى «تاتۋلىك» تاتار-باشقۇرت ەتنومادەني بىرلەستىگىنىڭ جەتەكشىسى گۇلسينا بايكەنوۆا.
بۇل كۇنى ەتنومادەني بىرلەستىكتەردىڭ مۇشەلەرى اۋەلەتە ءان سالدى, مىڭ بۇرالا بي بيلەدى. ولار تەك ءوز تىلدەرىندە عانا ەمەس, قازاق اندەرىن دە شىرقادى.
جولداسبەك شوپەعۇل,
«ەگەمەن قازاقستان».
كوكشەتاۋ
اقمولا وڭىرىندەگى بيىلعى 1 مامىر مەرەكەسى «قازاقستان حالقىنىڭ دوستىعى» اتاۋىنداعى كەڭ اۋقىمدى فەستيۆال رەتىندە اتاپ ءوتىلدى. التىن كۇن شاپاعىنا بولەنگەن كەربەز كوكشەتاۋ بار جاساۋىمەن جارقىراپ تۇر. كوشەلەر مەن الاڭداردا وبلىس اۋماعىنداعى تاتۋ-ءتاتتى تىرشىلىك كەشىپ وتىرعان ەتنوس وكىلدەرىنىڭ بارلىعى وزدەرىنىڭ ۇلتتىق كيىمدەرىمەن سالتانات قۇرىپ, ءان-بيدەن شاشۋ شاشۋدا.
فەستيۆال ابىلاي حان الاڭىنداعى 300 مەكتەپ وقۋشىسىنىڭ «بەيبىتشىلىك پەن دوستىق – بالالار كوزىمەن» اتتى اسفالتتاعى سۋرەت كونكۋرسىمەن باستالۋى ايرىقشا ماڭىزدى دەر ەدىك. ماسەلەن, قالاداعى №12 مەكتەپتىڭ سۋرەت-سىزۋ ءپانىنىڭ مۇعالىمى, رەسپۋبليكا وقۋ-اعارتۋ ءىسىنىڭ ۇزدىگى ءمۇتاللاپ يسقاقوۆ ءوزىنىڭ 24 وقۋشىسىنىڭ «مەنىڭ قازاقستانىم!» تاقىرىبىنداعى سۋرەتتەرىنەن بالالار قيالىنداعى ەرتەڭگى ماڭگىلىك ەلدى كورۋگە بولاتىنىن ايتادى. مۇندايدا ەسكەرتكىش تۇعىرداعى ابىلاي بابامىز دا «بارەكەلدىسىن» بىلدىرگەندەي بويىڭدى جىلى سەزىم كەرنەيدى. بۇل اسەردى ابىلاي حان مەن تاۋەلسىزدىك الاڭدارىن جالعاستىراتىن اللەياداعى قىلقالام شەبەرلەرى مەن ديزاينەرلەردىڭ, ساۋلەتشىلەردىڭ ينتەللەكتۋالدى «دوستىق داڭعىلى» شىعارماشىلىق كورمەسى دە قالىڭداتا تۇسەدى.
كوكشە تورىندە ەلىمىزدىڭ ءانۇرانى قالىقتادى. تاۋەلسىزدىك الاڭىنداعى شادىمان جۇرتقا وبلىس اكىمى سەرگەي كۋلاگين ءسوز ارناپ, اقمولالىقتاردىڭ مەرەكەلى جىلعى ەڭبەك تابىستارىنا, قوعامدىق جانە ساياسي ومىردەگى بەلسەندىلىگىنە ريزاشىلىعىن ءبىلدىردى. سونداي-اق, ول قازاقستان حالقى اسسامبلەياسى كەڭەسىنىڭ شەشىمىمەن ءبىر توپ ازاماتقا «بىرلىك» التىن مەدالى مەن «قازاقستان حالقى اسسامبلەياسىنا – 20 جىل» مەرەكەلىك مەدالدارىن تابىس ەتتى. فەستيۆالعا قاتىسۋشىلاردى ەتنومادەني ورتالىقتاردىڭ باسشىلارى مەن بەلسەندىلەرى قىزۋ قۇتتىقتادى.
اۋقىمدى شارادا كوكشەلىكتەر نازارىنا التى تاريحي تارماقتان تۇراتىن تەاترلاندىرىلعان كورىنىس ۇسىنىلدى. كوز الدىمىزدا قازاق حاندىعىنىڭ قۇرىلۋىنىڭ, دەپورتاتسياعا ۇشىراعان ۇلتتار مەن ۇلىستاردىڭ قازاق جەرىن مەكەندەۋىنىڭ, ۇلى وتان سوعىسىنداعى جەڭىسىمىزدىڭ, تىڭ يگەرۋ كەزەڭىنىڭ, بۇگىنگى شات تۇرمىسىمىزدىڭ شەجىرەسى جىلجىپ ءوتىپ جاتىر. بۇل شەرۋ بولاشاق ماقساتتارمەن ۇشتاسىپ كەتەتىندىگىمەن دە عاجاپ.
مەرەكە حالىق دوستىعىنىڭ ورتاق داستارقان بايلىعىمەن, كەڭ كولەمدى كونتسەرتتىك باعدارلامالارمەن جالعاستى.
اۋداندارداعى الاقاي مەيرام دا تانىمدىق سيپات الدى.
باقبەرگەن امالبەك,
«ەگەمەن قازاقستان».
سۋرەتتى تۇسىرگەن
تولەگەن قوسشىعۇلوۆ.
قاراعاندى
ەلىمىز ومىرىندەگى قۋانىشتى وقيعاعا تابيعات ءوزى دە سىي جاساعانداي مامىردىڭ العاشقى كۇنى نۇرىن مولىنان توگىپ, ادامدار مەن قالا اجارىن ودان سايىن جايناتىپ جىبەردى. جان-جاقتان اعىلعان قاۋىم قاتارى مەجەلى ۋاقىتتا قالىڭداي ءتۇسىپ, ۇزىننان-ۇزاق بۇقار جىراۋ داڭعىلى لىق تولدى. قولتىقتاسا ساپ تۇزەپ, ءار تىلدە قوسىلا ءان شىرقاپ, باقىتتى تۇرمىس پەن تاتۋ-ءتاتتى ومىرگە شاتتىق ەسكەن شەرۋ كوتەرىڭكى كوڭىل كۇيمەن العا باستى. ورتاق تىلەك, ءبىر ماقسات توعىستىرعان مەرەكەلىك سالتاناتقا قاتىسۋشىلار «العا, قازاقستان!», «ءبىز نازارباەۆپەن ءبىرگەمىز!» دەپ ءبىر كىسىدەي ءۇن تاستاپ, ءتاۋەلسىزدىك ەسكەرتكىشىن گۇل شوقتارىنا كومكەردى.
وبلىس اكىمى نۇرمۇحامبەت ابدىبەكوۆ بىرلىك پەن تۇتاستىقتىڭ, دوستىق پەن ىنتىماقتىڭ مەرەيلى مەرەكەسىمەن قۇتتىقتاپ, ەلباسى اتىنان ءار وتباسىنا قۇت-بەرەكە, جارقىن بولاشاق تىلەدى. شەرۋشىلەر كەۋدەلەرى جاۋىنگەرلىك ماراپاتتارعا تولى سوعىس ارداگەرلەرىنە باس ءيىپ, قۇرمەت كورسەتتى. ايماق باسشىسى ۇلتتار اراسىنداعى باۋىرلاستىققا, قوعامدىق كەلىسىمگە ۇيىستىرۋشى بىرقاتار ەتنومادەني بىرلەستىكتەرگە وبلىس اكىمىنىڭ گرانتىن تاپسىرىپ, بەلسەندى مۇشەلەرىنە مەرەيتويلىق مەدالدار تابىس ەتتى.
– ءبارىمىز شىنايى رازىلىقپەن داۋىس بەرىپ, قايتادان سايلانعان ەلباسىمىز تۇراقتىلىق پەن دامۋدىڭ كەپىلى. سوندىقتان ءبىز ن.ءا.نازارباەۆتى ءاردايىم قولدايمىز, – دەدى وبلىستىق ليتۆان «ليتۋانيك» ۇيىمىنىڭ جەتەكشىسى, قازاقستان حالقى اسسامبلەياسىنىڭ مۇشەسى ۆيتالي تۆاريوناس.
10 مىڭنان استام ادام باس قوسقان شەرۋ سالتاناتى قالانىڭ بارلىق ءبولىگىندە جالعاستى. اۋداندار ورتالىقتارى مەن كەنتتەردە دە مەرەكەلىك شەرۋلەر بولىپ ءوتتى. كەشكىلىك تۇنگى اسپاندى وتشاشۋلار جارقىراتتى.
ايقىن نەسىپباي,
«ەگەمەن قازاقستان».
قوستاناي
1 مامىر – قازاقستان حالقىنىڭ ءبىرلىگى كۇنى قوستاناي قالاسى جۇرتشىلىعىنىڭ كوپتەن كۇتكەن مەرەكەسى. اۋا رايى دا ادامداردىڭ دوستىق كوڭىل كۇيىندەي رياسىز شۋاعىن توكتى. كوپتەن بەرى قۇبىلعان كوكتەمنىڭ كۇنى جارقىراپ, كوك زەڭگىر اسپان تۇپ-تۇنىق بولىپ تۇر. جەر-دۇنيە جاسىل تۇسكە ەنىپ, قۇلپىرا تۇسكەن. تال-تەرەك بۇرشىك اتىپ, قايىڭ سىرعا تاقتى. ورتالىقتا مەرەكەلىك دۋمان تاڭەرتەڭنەن باستالدى. قازاقتىڭ جانە ءتۇرلى ۇلتتاردىڭ ءان-كۇيى مەرەكەنىڭ شاتتىعىن ەسەلەدى. ورتالىقتا ۇيىمداستىرىلعان ءتۇرلى ۇلتتاردىڭ مۋزىكالىق اسپاپتارى كورمەسىن تاماشالاعاندار ولاردان توگىلگەن شىعارمالاردى تازا تابيعي كۇيىندە تىڭدادى.
– «ونەردە شەكارا جوق» دەگەن راس. مەرەكەگە كەلىپ قانشاما ۇلتتىڭ بۇرىن ءوزىم كورمەگەن مۋزىكالىق اسپاپتارىن تاماشالادىم. ماعان ءوزىمىزدىڭ دومبىرا, قوبىزىمىز جانە قاتار جۇرگەن ورىستىڭ, تاتاردىڭ سىرنايى مەن بالالايكاسى تانىس ەدى. ال ارميانداردىڭ, كورەيلەردىڭ, چەشەندەردىڭ, ازەربايجانداردىڭ, تاعى باسقالاردىڭ اسپاپتارىن ءبىرىنشى رەت كورگەنىمدى دە جاسىرمايمىن. قىرعىزدىڭ قومىزىن قىرعىز بالاعا ويناتىپ ءبىراز تىڭدادىم. كورەيدىڭ باراباندارىن ءوزىمىزدىڭ قوستانايلىق قىزدار قالاي ادەمى ۇرادى, – دەپ ادەمى اسەرىن ءبولىستى قوستاناي قالاسىنىڭ تۇرعىنى جامال مەدەباەۆا اپاي.
سونىمەن قاتار, مەرەكەگە جينالعان قوستانايلىقتار ءار ۇلتتىڭ ىدىستارىن دا تاماشالادى.
– بيىلعى مەرەكە قازاقستان حالقى اسسامبلەياسىنىڭ, كونستيتۋتسيامىزدىڭ – 20, جەڭىستىڭ – 70 جانە قازاق حاندىعىنىڭ 550 جىلدىعىمەن تۇسپا-تۇس كەلدى. سوندىقتان ءبىز بيىل بۇل مەرەكەنىڭ تانىمدىق جاعىنا كوپ كوڭىل بولدىك. ءتۇرلى ۇلتتار مۋزىكالىق اسپاپتارىمەن قاتار, ءتۇرلى ۇلتتاردىڭ پايدالاناتىن ىدىستارى كورمەسىن دە ۇسىنىپ وتىرمىز. بارلىق جاقسى قاسيەت وتباسىنان داريدى. داستارقان باسىندا بەرەكە بولسا, ەلىمىزدە دە تىنىشتىق, بەيبىتشىلىك بولادى دەپ تۇيدىك. ىدىستار تاريحىن تاماشالاعاندار كوپ, – دەيدى وبلىستىق مادەنيەت باسقارماسىنىڭ باسشىسى لاريسا سەروۋس.
بالالاردىڭ تاسجولعا سالعان سۋرەتى مەرەكە ءسانىن دە, ءمانىن دە ارتتىرا ءتۇستى. حالىقتىق ءان-بي, ويىندار دوستىق پەن بىرلىكتىڭ سالتاناتىنداي كورىندى.
ءنازيرا جارىمبەتوۆا,
«ەگەمەن قازاقستان».
قىزىلوردا
بەرەكە مەن بىرلىكتىڭ تۋى جەلبىرەپ, ەڭبەك پەن دوستىقتىڭ كۇيىن شەرتەتىن عاجايىپ مەزگىلدى سىر جۇرتشىلىعى دا اسىعا كۇتەدى. «بىرلىك پەن تاتۋلىق مەكەنى – قازاقستان». «تىلەگى ءبىردىڭ جۇرەگى ءبىر». «بىرلىگى جاراسقان قازاقستان!» دەپ ۇرانداعان قىزىلوردالىقتار مەرەكەنى تويلاۋدى كۇنمەن تالاسىپ باستاپ كەتتى.
ەڭ الدىمەن, بارلىق مەكەمەلەردىڭ قاتىسۋىمەن شەرۋ ۇيىمداستىرىلدى. ەڭبەك ادامدارىنان باستاپ, ەلدىڭ دامۋىنا وزىندىك ۇلەس قوسىپ جۇرگەن ازاماتتار بىرلىكتىڭ تۋىن جەلبىرەتىپ شەرۋگە قاتىستى.
مۇنان سوڭ تاتۋلىعى تۇعىرلى, بىرلىگى بەرەكەلى, تىرلىگى مەرەكەلى سىر ەلىنىڭ حالقىن وبلىس اكىمى قىرىمبەك كوشەرباەۆ قۇتتىقتادى.
– ءبىز ءبىر ماقسات, ءبىر مۇددە, ءبىر بولاشاق جولىنا جۇمىلعان قۋاتتى ەلمىز. قوعامدىق كەلىسىم مەن ساياسي تۇراقتىلىق – ءبىزدىڭ ەڭ جوعارى بايلىعىمىز. بۇل جەتىستىكتى باعالاۋ, ونى ساقتاۋ جولىندا ايانباي ەڭبەك ەتۋ – ءاربىر قازاقستان ازاماتىنىڭ مىندەتى. تۋعان جەردىڭ توسىندە, بەيبىت ەلدىڭ ءىشىندە ەل بىرلىگىن ساقتاۋعا اتسالىسايىق! بەيبىت ءومىردىڭ بەرەكەسى, حالقىمىزدىڭ ىنتىماق, بىرلىگى ارتا بەرسىن,– دەدى ايماق باسشىسى.
ۇلتتار تۇتاستىعى مەن حالىقتار دوستىعىنىڭ ارقاسىندا بۇگىندە مەملەكەتىمىز وركەندەپ, ىلگەرى باسىپ كەلەدى. سىر ەلىندە 70-كە جۋىق وزگە ۇلت پەن ۇلىستىڭ وكىلدەرى تۇرادى. 11 ەتنومادەني ورتالىق بار. بارلىعى مەرەكە كۇنى كونتسەرتتىك باعدارلاما دايىنداپ, بىرلىكتىڭ بەكەمدىگىن كورسەتتى.
وبلىستىڭ بارلىق قالا, اۋدان, اۋىلدارىندا مەرەكە جوعارى دەڭگەيدە اتالىپ ءوتتى, ءتۇرلى سپورت سايىستارى, فلەشموب ۇيىمداستىرىلدى.
ەرجان بايتىلەس,
«ەگەمەن قازاقستان».
ورال
1 مامىر – قازاقستان حالقى ءبىرلىگى كۇنى اقجايىق اسپانىنان كۇن شۋاعى مولىنان توگىلىپ, باتىسقازاقستاندىقتاردىڭ كوڭىل-كۇيى دە تابيعاتپەن ۇندەستىك تاپقانداي وتە كوتەرىڭكى بولدى. وسىنداي شات-شادىمان احۋال اۋانى ورال قالاسى مەن وبلىس اۋداندارىندا وتكىزىلگەن مەرەكەلىك شەرۋلەر كەزىندە دە ايقىن اڭعارىلىپ تۇردى. ونىڭ سوڭى كونتسەرتتىك باعدارلامالار مەن جارمەڭكەلەرگە ۇلاستى.
ءبىرىنشى مامىر كۇنى قارساڭىندا ورال وڭىرىندە بارلىق تۇرعىنداردى بىرلىك پەن تاتۋلىققا جانە ىنتىماققا ۇندەيتىن ءارى وسى ءۇش تۇعىردى ودان ءارى تەرەڭدەتە تۇسە الاتىن ءمانى مەن ماعىناسى زور ءىس-شارالار كەشەنى مارەگە جەتتى. سونىڭ ءبىرى – قازاقستان حالقى اسسامبلەياسى جىلىنا وراي وبلىستا ۇيىمداستىرىلعان «بەيبىتشىلىك پەن كەلىسىمنىڭ جول كارتاسى» ەستافەتاسى.
بۇل مەرەكەلىك مەگاجوبا بيىلعى جىلدىڭ اقپان ايىندا باستاۋ الىپ, وسى رياسىز راسىمگە ساي ورال قالاسىنىڭ دەلەگاتسياسى زەلەنوۆ اۋدانىنا ەستافەتانى تاپسىرعان بولاتىن. سول ۋاقىتتان بەرى بۇل يگى ءىس كوپ ەتنوستى ءوڭىردىڭ بارلىق تۇپكىرلەرى مەن ەلدى مەكەندەرىن قامتىپ, تۇرعىنداردىڭ ىنتىماعىن ارتتىرىپ, ولاردىڭ اراسىنداعى مادەني-الەۋمەتتىك بايلانىستاردى ودان ءارى جەتىلدىرۋگە ىقپال جاسادى. وسىلايشا كەشە مەرەكەلىك ەستافەتانى تەرەكتى اۋدانىنىڭ دەلەگاتسياسى ورال قالاسىنا قايتا جەتكىزدى.
ءبىز بىرلىك كۇنى ورال قالاسىنىڭ ورتالىق الاڭى ارقىلى مەرەكەلىك شەرۋدەن ءجۇرىپ وتكەن ءبىر جاس تۇرعىندى سوزگە تارتقان ەدىك. ول ءوزىن يگور سپيريدونوۆ, باتىس قازاقستان وبلىستىق قازاقستان حالقى اسسامبلەياسى جانىنداعى جاستار قاناتىنىڭ توراعاسىمىن دەپ تانىستىردى. كوزىندە وت, بويىندا جىگەر مەن قايرات بىردەن بايقالاتىن جاس ورەن بىزگە ءوز تىلەگىن بىلايشا جەتكىزدى: «جىل سايىن 1 مامىر كۇنى كەلەتىن قازاقستان حالقى بىرلىگى كۇنىن ايرىقشا تەرەڭ سەزىممەن قارسىلايمىن. جاستار ەلدىڭ ۇلكەن ءۇمىت ارتاتىن ستراتەگيالىق رەسۋرسى. مەن ءوزىمنىڭ تاۋەلسىز قازاقستاندا تۇرىپ ءومىر ءسۇرىپ جاتقانىمدى ۇنەمى ماقتانىش ەتەمىن. سونداي-اق, قاشاندا مەملەكەت باسشىسى ساياساتىن قولدايتىن بەلسەندى جاستار قاتارىندا جۇرگىم كەلەدى. ءبىز ساپالى ءبىلىم الىپ, ينتەللەكتۋالدىق مۇمكىندىگىمىزدى دامىتۋعا مۇددەلىمىز. قازىر قازاقستان حالقى اسسامبلەياسىنىڭ جاستار قاناتى پرەزيدەنت بەلگىلەگەن بەيبىتشىلىك پەن كەلىسىم باعىتىن ىسكە اسىرۋ ءۇشىن سەرپىندى ىستەرگە باستاماشى بولىپ وتىر».
تەمىر قۇسايىن,
«ەگەمەن قازاقستان».
وسكەمەن
شىعىس جۇرتشىلىعى ەلىمىزدىڭ بىرلىك كۇنىن – «مەن – قازاقستاننىڭ پاتريوتىمىن!» سالتاناتتى شەرۋىمەن قارسى الدى. وبلىس ورتالىعىنداعى مەرەكەلىك شەرۋگە 15 مىڭنان استام قالا تۇرعىندارى مەن قوناقتارى قاتىستى. ءوڭىردىڭ بارلىق اۋداندارى مەن قالالارىندا, اۋىل-ايماقتارىندا ايرىقشا ءسان-سالتاناتىمەن وتكەن مەرەكەدە وسكەمەندىكتەر استانا كوشەسىنەن باستاپ رەسپۋبليكا الاڭىنا دەيىن شەرۋ ۇيىمداستىردى. 5518 اسكەري ءبولىمىنىڭ وركەسترى باستاعان سالتاناتتى شەرۋگە ءتۇرلى ەتنومادەني بىرلەستىكتەردىڭ وكىلدەرى, بايكەرلەر مەن «بيپەك اۆتو» اۆتوكولىكتەر كەرۋەنى, «كازتسينك», ءۇلبى مەتاللۋرگيا زاۋىتى, وسكەمەن تيتان-ماگني كومبيناتى, «ازيا اۆتو» سىندى وڭىردەگى 88 كاسىپورىن مەن ۇيىمداردىڭ جۇمىسشىلارى, مەملەكەتتىك مەكەمەلەردىڭ قىزمەتكەرلەرى, جوعارى جانە ورتا وقۋ ورىندارىنىڭ ستۋدەنتتەرى, مەكتەپ وقۋشىلارى قاتىستى.
– ەلىمىزدىڭ باعا جەتپەس بايلىعى – بەرەكەسى مەن بىرلىگى جاراسقان, تاتۋلىق پەن كەلىسىمنىڭ تۋىن تىككەن كوپۇلتتى حالقى. بۇل – قازاقستان حالقىنىڭ مىزعىماس دوستىعىنىڭ, وتانعا دەگەن ماڭگىلىك ماحابباتىنىڭ مەرەكەسى, – دەدى ايماق جۇرتىن قۇتتىقتاعان ءوڭىر باسشىسى دانيال احمەتوۆ.
شەرۋگە قاتىسۋشىلار قازاقستان حالقى اسسامبلەياسىنىڭ 20 جىلدىق مەرەيتويىنا وراي اسپانعا 20 اق كوگەرشىن مەن 20 مىڭ شار ۇشىردى. بىرلىك كۇنى مەرەكەلىك كونتسەرتكە ۇلاسىپ, دوستىقتى تۋ ەتكەن ونەرپازدار ءوڭىر جۇرتشىلىعىن ءان-بيىمەن قۋانتتى. گىر تاسىن كوتەرۋ, قول كۇرەس, ارقان تارتۋ, شاحمات جانە دويبى ويىندارىنان سايىستار ءوتتى. سونداي-اق, بۇل كۇنى «مەتاللۋرگ», «جاستار», «ساۋلەتاي» جانە جامبىل اتىنداعى ساياباق سىندى كوپشىلىك دەمالىس ورىندارى اشىلدى. سايلاۋعا بەلسەنە قاتىسقان وقۋ ورىندارى ماراپاتتالدى. مەرەكە كەشكىلىك «ستۋدەنت كوكتەمى» گالا-كونتسەرتىمەن, جاستاردىڭ بي كەشىمەن جالعاستى.
دۋمان اناش,
«ەگەمەن قازاقستان».
پاۆلودار
بيىلعى 1 مامىر – قازاقستان حالقىنىڭ بىرلىگى كۇنى مەرەكەسى, تاتۋلىق پەن تۇراقتىلىق تاقىرىبىنا ارنالدى. كۇن دە جىلىندى. اينالا قۇلپىرىپ جايناپ تۇر. اسەم اۋەندەر شالىقتاپ, بۇكىل قالانى مەرەكەلىك كوڭىل-كۇي دۋمانعا بولەگەن.
ال, وسىدان ءبىر كۇن بۇرىن وبلىس ورتالىعىنداعى دوستىق ۇيىندە وبلىس اكىمى قانات بوزىمباەۆ ءوڭىردىڭ ەتنومادەني بىرلەستىكتەرىنىڭ باسشىلارىنا ارنايى گرانتتار تابىس ەتتى. بىرلىك كۇنى مەرەكەسىنە وراي قۇرامىندا موردۆا, ۋدمۋرت, كومي-پەرمياك, ماري, ۆەنگر ۇلتتارى وكىلدەرى بار فينۋگور ەتنومادەني ورتالىعى اشىلدى. ۋدمۋرتيادان قوناقتار كەلىپ, ەتنومادەني بىرلەستىك اشىلۋىنا وراي, الاڭ ورتاسىندا تولقي ءسوز سويلەدى.
وسى جاقسى جاڭالىقتاردىڭ سوڭى كەشە قالا تۇرعىندارى, قوناقتارى ورتالىق الاڭ مەن ەرتىس وزەنى جاعالاۋىندا, قالالىق مادەنيەت جانە دەمالىس ساياباعىندا جالعاسىپ, قىزىققا تولى دۋماندى مەرەكەلىك شارالارعا تولى بولدى. مەرەكەنىڭ «تىلەگىمىز – تاتۋلىق, تىرەگىمىز – تۇراقتىلىق» تاقىرىبىنا ساي ەكران ارقىلى ارنايى جاسالعان مەرەكەلىك جۋرنال پاراقتارى اشىلدى. قازاقستان حالقى اسسامبلەياسىنىڭ 20 جىلدىعىنا وراي ەتنومادەني بىرلەستىكتەر جانە قالا جاستارىنىڭ قاتىسۋىمەن تەاترلاندىرىلعان قويىلىم, ەتنومادەني بىرلەستىكتەردىڭ كونتسەرتى جانە يسا بايزاقوۆ اتىنداعى وبلىستىق فيلارمونيانىڭ كونتسەرتتىك باعدارلاماسى ۇسىنىلدى.
ورتالىق الاڭدا حالىق كوپ. وبلىس باسشىلىعى, سوعىس جانە ەڭبەك ارداگەرلەرى قۇتتىقتاۋ سوزدەرىن ارناۋدا. مەرەكەنىڭ ءسان سالتاناتىن قىزىقتاعان ۇلكەندەر, ءان شىرقاپ, بي بيلەپ قۋانىشتى جاستار, قىزىل-جاسىل شارلار كوتەرگەن كىشكەنتاي بوبەكتەر اينالا دۋمان ءسانىن كەلتىردى. ساعات تۇسكى 12.00-دە ورتالىق الاڭدا ەتنومادەني بىرلەستىكتەردىڭ قولدانبالى شىعارماشىلىق جانە ءداستۇرلى اسپازدىق «ەتنوقالاشىق» شەبەرلىك كورمەسى ءوتتى. بالالار ءۇشىن شاپيتو تسيركىنىڭ مەرەكەلىك باعدارلاماسى, ەكزوتيكالىق جانۋارلار مەن حايۋانداردىڭ زووپاركى اشىلدى. جاعالاۋدا سپورتتىق ويىن-ساۋىق باعدارلاماسى قىزسا, «تاتۋلىقتىڭ تۇتقاسى, بىرلىكتىڭ بەسىگى», قالالىق مادەني ساۋىق ورتالىعى مەن بالالار شىعارماشىلىق جانە تاربيە ورتالىعى ۇيىمدارىنىڭ «بەيبىت بولسىن بولاشاق» مەرەكەلىك كونتسەرتتىك باعدارلاماسىمەن جاراسىم تاپتى.
فاريدا بىقاي,
«ەگەمەن قازاقستان».
پەتروپاۆل
قازاقستان حالقىنىڭ بىرلىگى كۇنى قىزىلجار وڭىرىندە دە دوستىق پەن تاتۋلىقتىڭ, بەيبىتشىلىك پەن مىزعىماس تۇراقتىلىقتىڭ مەرەكەسى رەتىندە كوتەرىڭكى كوڭىلمەن, جارقىن جۇزبەن اسقاق رۋحتا اتالىپ ءوتتى. ادامدار ءبىر-بىرىنە اماندىق, ساۋلىق جولداپ, ەلىمىزدىڭ ايبارى اسقاقتاي بەرۋىن تىلەدى. قازاقستان حالقى اسسامبلەياسىنىڭ 20 جىلدىق مەرەيتويىمەن تۇسپا-تۇس كەلگەن مەرەكە ەل دامۋىنىڭ قارىشتى قادامى, بەدەل-ابىرويىمىزدىڭ اسقاقتاۋ, ءار شاڭىراققا شاتتىق قونعان, ۇلتتار مەن ۇلىستاردى ۇيىستىرعان مەيرام رەتىندە باعالانىپ, ۇلتتىق قۇندىلىقتارىمىزدىڭ قادىر-قاسيەتتەرى ۇلىقتالدى.
مەرەكە سالتاناتى تاۋەلسىزدىك ستەلاسى جانىنان باستالدى. وندا وبلىس اكىمى ەرىك سۇلتانوۆ تۇرعىندارعا جىلى لەبىزگە تولى قۇتتىقتاۋىن ارناپ, ەلباسى اتىنان 36 سولتۇستىكقازاقستاندىققا «قازاقستان حالقى اسسامبلەياسىنا – 20 جىل» مەرەكەلىك مەدالىن تابىس ەتتى.
قالانىڭ بارلىق شاعىن اۋداندارىندا ۇيىمداستىرىلعان مەرەكەلىك باعدارلامالاردى قىزىقتاعان جۇرتشىلىق قاتارى قالىڭ بولدى. دوستىق ۇيىندە وتكەن «حالىقتىڭ اسىل قازىناسى» اتتى بايقاۋعا 19 ەتنوستىق كلۋب قىزىعۋشىلىق كورسەتىپ, ءوز نومىرلەرىندە ورتاق شاڭىراق استىندا ءبىر ءۇيدىڭ بالاسىنداي, ءبىر قولدىڭ سالاسىنداي تاتۋ-ءتاتتى ىنتىماقتا ءومىر ءسۇرىپ جاتقان ۇلىستاردىڭ باياندى تىرلىگىن, بەرىك بىرلىگىن ارقاۋ ەتتى. «قوعامدىق كەلىسىم» مەكەمەسى ۇيىمداستىرعان «ماڭگىلىك ەل: ءبىر ەل – ءبىر تاعدىر» كونكۋرسى كوپشىلىك تالعامىنان شىقتى. وندا بالالار ءارتۇرلى تاقىرىپتار بويىنشا سۋرەت سالۋدان سىنعا ءتۇسىپ, شىعارماشىلىق قارىم-قابىلەتتەرىن تانىتتى. اباي مەن پۋشكين ەسكەرتكىشى قاسىندا «دوستىقتىڭ ساز الەمى» مۋزىكالىق-بي كومپوزيتسياسى قانات قاقسا, «اسسامبلەيا ارۋى» اتتى ءتۇرلى ەتنوستاردىڭ ادەمى ارۋلارى قاتىسقان بايقاۋ دا ءوز كورەرمەندەرىن ريزا ەتتى. دەمالىس جانە مادەنيەت ساياباعىندا ستۋدەنت-جاستار «دوستىق دارحانى» فلەش-موب, قىزىقتى كونكۋرستار ۇيىمداستىردى.
مەرەكەنىڭ ءسانىن قازاقستاندىقتاردىڭ تاتۋلىعى مەن كەلىسىمىن پاش ەتكەن كەشكى مەرەكەلىك كونتسەرت كەلتىردى. ول شىن مانىندەگى دوستىق ءان-جىر, بي ارقاۋىنا اينالىپ, قىر بەتىن قىزعالداققا تولتىرىپ جىبەرگەندەي اسەرگە بولەدى.
ءومىر ەسقالي,
«ەگەمەن قازاقستان».
سۋرەتتى تۇسىرگەن
تالعات تانىباەۆ.
تالدىقورعان
جەتىسۋ جەرىندە ىنتىماعى جاراسىپ, بىرلىكتەرى نىعايىپ, باقۋاتتى ءومىر ءسۇرىپ جاتقان 103 ەتنوس وكىلى تالدىقورعانداعى ورتالىق الاڭعا كوپتەپ جينالدى. ادامدار اراسىنداعى قۋانىشتى تابيعات-انا دا قۇپ كورسە كەرەك, اسپان استى شايداي اشىق. اۋادا ءلۇپ ەتكەن جەل دە جوق.
ءسانى مەن سالتاناتى ارتقان جەتىسۋلىقتاردىڭ الدىنا الماتى وبلىسىنىڭ اكىمى اماندىق باتالوۆ شىعىپ: «بۇگىنگى قۋانىش – وتانعا دەگەن پاتريوتتىق سەزىم مەن سۇيىسپەنشىلىكتىڭ, تۇراقتىلىق پەن كەلىسىم مەرەكەسى. قازاقستان – بەرەكە مەن بىرلىكتىڭ, دوستىقتىڭ مەكەنى. مۇندا ءبىر شاڭىراق استىندا كوپتەگەن ۇلتتار مەن ۇلىستار تاتۋ-ءتاتتى عۇمىر كەشۋدە. سوندىقتان دا ەلىمىزدەگى قوعامدىق كەلىسىم مەن ساياسي تۇراقتىلىقتى الەم باعالاپ, مويىنداپ وتىربۇكىل الەم ەلباسىمىز نۇرسۇلتان نازارباەۆتىڭ كەمەڭگەر كوشباسشى, ساڭلاق ساياساتكەر ەكەندىگىن تاعى ءبىر مويىندادى. پرەزيدەنتتىك سايلاۋ ەلدىڭ بىرلىگى مەن تۇراقتىلىعىن نىعايتا ءتۇستى. حالقىمىز ءوزىنىڭ نۇرلى بولاشاعىن تۇڭعىش پرەزيدەنتپەن بايلانىستىراتىنىن كورسەتتى. تاۋەلسىزدىك جىلدارى قازاقستاننىڭ ۇلتارالىق كەلىسىمى نىعايدى, ساياسي تۇراقتىلىعى بەكەمدەنە ءتۇستى, مەملەكەتتىڭ دامۋىنا باعىتتالعان باعدارلامالار ءساتتى جۇزەگە اسىرىلدى. وسىنىڭ ءبارى – پرەزيدەنتتىڭ سەنىمدى جەڭىسىنىڭ ايعاعى», – دەدى وبلىس اكىمى
حالىقتىڭ ەرلىگى – ەڭبەكتە, باقىتى – باۋىرمالدىعىندا, جاسامپازدىعى – جارقىن ىستەرىندە. سوندىقتان بەيبىت ومىردەگى تابىستى ءىسىمىزدى, بەرەكە-بىرلىگىمىزدى ماقتان ەتكەن مەرەكەلىك باسقوسۋ ءسۇيىنباي اتىنداعى وبلىستىق فيلارمونيا كونتسەرتتىك باعدارلاماسىمەن جالعاسىپ, جالپىحالىقتىق مەرەكەمەن ۇلاستى.
نۇربول الدىباەۆ,
«ەگەمەن قازاقستان».
تاراز
قازاقستان حالقىنىڭ بىرلىگى كۇنى مەرەكەسى ەلىمىز تاۋەلسىزدىك العان جىلداردان بەرى جاڭاشا سيپاتقا يە بولدى. ويتكەنى, بىرلىك پەن ىنتىماق, دوستىق پەن تۋىسقاندىق بۇگىندە كوپۇلتتى قازاقستاننىڭ قارقىندى دامۋىنىڭ كەپىلى. بيىل قازاقستان حالقى اسسامبلەياسىنىڭ 20 جىلدىعىنىڭ ەلىمىزدە كەڭ كولەمدە اتاپ ءوتىلۋى ەلدىگىمىزدىڭ قالىپتاسۋى مەن تاۋەلسىزدىگىمىزدىڭ نىعايۋ تاريحىندا ايرىقشا ءرول اتقارۋدا. ال, كەشەگى سايلاۋدا ەلباسى مەرەيىنىڭ ۇستەم بولۋى كوپ ۇلتتى حالقىمىزدىڭ ەلباسىنا دەگەن ىستىق ىقىلاسى, شەكسىز قۇرمەتىنىڭ كورىنىسى ەكەنى انىق. «تاتۋ ەلدىڭ شىعار تاۋى بيىك» دەگەن مىنە, وسى بولسا كەرەك.
«بۇل كۇن – حالىق اراسىنداعى دوستىقتىڭ بەلگىسى, ءوزارا باۋىرماشىلدىق پەن تۇسىنىستىكتىڭ نىشانىنا اينالعان مەرەيلى مەيرام. ءبىزدىڭ ءبىرتۇتاس حالقىمىزدىڭ داستۇرىنە ەنىپ, بەيبىتشىلىك پەن ءوزارا سىيلاستىقتىڭ سيمۆولىنا اينالدى. الدىمىزدا مەملەكەت باسشىسى بەلگىلەگەن «ءماڭگىلىك ەل» ۇلتتىق يدەياسى مەن «قازاقستان-2050» ستراتەگياسىن, «نۇرلى جول» باعدارلاماسى مەن بەس حالىقتىق رەفورمانى ورىنداۋ ماقساتتارى تۇر. مۇنىڭ بارلىعى دا تاعدىرى ءبىر, وتانى ءبىر حالقىمىزدىڭ كەلەشەگى, ۇرپاعىمىزدىڭ بولاشاعى ءۇشىن جاسالۋدا. جامبىلدىقتار دا بارشا قازاقستاندىقتار سياقتى ۇلى ماقساتتارعا قول جەتكىزۋ جولىندا جۇمىلا ەڭبەك ەتەتىنىنە سەنىمدىمىن», – دەدى اۋليەاتالىقتاردى قۇتتىقتاعان جامبىل وبلىسىنىڭ اكىمى كارىم كوكىرەكباەۆ.
بىرلىك پەن ىنتىماقتىڭ المايتىن قامالى, شىقپايتىن شىڭى, اسپايتىن اسۋى جوق. ايتۋلى مەرەكەنى جامبىلدىقتار كوتەرىڭكى كوڭىل-كۇيدە اتاپ ءوتىپ, تاراز قالاسىنىڭ «دوستىق» الاڭىندا وتكەن مەرەكەلىك شەرۋدىڭ سوڭى ۇلتتىق جانە سپورتتىق ويىندار, ونەر مايتالماندارىنىڭ كونتسەرتى مەن كوپشىلىك سەرۋەنگە ۇلاستى. ونەر ءاربىر ۇلتتى ءبىر-بىرىنە جاقىنداستىراتىن, تەڭەستىرەتىن قۇدىرەتتى كۇش قوي. سوندىقتان دا مەرەكەدە ايتىلعان, ءتۇرلى تىلدە ايتىلعان ءاندى دە, ءتۇرلى ۇلتتار بيلەگەن ءبيدى دە ەشكىم جاتىرقاعان جوق. قايتا كوپتىڭ كوڭىلى دوستىقتىڭ ارناسىندا توعىستى. مەرەكە كەشكىلىك ونەر جۇلدىزدارىنىڭ كونتسەرتىنە ۇلاسىپ, جاستار ءوزارا بي جارىستىردى.
ورالحان ءداۋىت,
«ەگەمەن قازاقستان».
سۋرەتتى تۇسىرگەن
التىنبەك قارتاباي.
شىمكەنت
1 مامىر – قازاقستان حالقىنىڭ بىرلىگى كۇنى مەرەكەسى شىمكەنتتەگى جاڭا اكىمشىلىك-ىسكەرلىك ورتالىعىنىڭ الاڭىندا ءوتتى.
وڭتۇستىكتە بىرلىگى جاراسقان, ءبىر ءۇيدىڭ بالاسىنداي, ءبىر قولدىڭ سالاسىنداي 100-دەن استام ۇلت پەن ۇلىستىڭ وكىلدەرى تۇرادى. سالتاناتتى مەرەكەدە ولار شەرۋ تارتىپ, ۇلتتىق اۋەندەر سارىنىمەن الاڭعا ءوتتى. مىنبەگە ۇلتتىق-مادەني ورتالىقتاردىڭ توراعالارى شاقىرىلىپ, وبلىس اكىمى اسقار مىرزاحمەتوۆ جۇرتشىلىقتى مەرەيلى مەرەكەمەن قۇتتىقتادى.
تاريحتىڭ قاي پاراعىن اشساڭ دا ەلدىڭ اڭساعان ماقسات-مۇراتى بەيبىتشىلىك بولعاندىعىن, قازاقستان تاۋەلسىزدىك العاننان بەرى ەلباسى وسى ۇلى مۇرات جولىندا تالماي جۇمىس جاساپ كەلە جاتقاندىعىن, بۇگىنگى مەملەكەتتىك ساياساتتىڭ تۇپقازىعى ەل بىرلىگى ەكەندىگىن ايتقان وبلىس باسشىسى بۇعان وڭتۇستىكقازاقستاندىقتاردىڭ دا ايتۋلى ۇلەس قوسقاندىعىنا توقتالدى. ونىڭ ايقىن دالەلى رەتىندە كەشەگى پرەزيدەنتتىك سايلاۋدا حالىقتىڭ تىلەگى ءبىر ارنادان توعىسىپ, قازاقستان حالىقتارىنىڭ ىنتىماقتاستىعى الەمگە ءماشھۇر بولعاندىعىن, تونىكوك بابا زامانىنان امانات بولعان ماڭگىلىك ەل مۇراتىنا بىرگە جەتەتىندىگىن ايتتى.
قازاقستان حالقى اسسامبلەياسى جىلىن مەرەكەلەۋ اياسىندا ەل بىرلىگىن نىعايتۋعا, مادەنيەتارالىق ۇنقاتىسۋدى دامىتۋعا جانە قازاقستاندىق پاتريوتيزمدى قالىپتاستىرۋعا قوسقان ەلەۋلى ۇلەسى ءۇشىن تولەبي اۋدانى «تاعاينا» جالپى ورتا مەكتەبىنىڭ ديرەكتورى كاديروۆ وسمانالي, وڭتۇستىك قازاقستان مەملەكەتتىك پەداگوگيكالىق ينستيتۋتىنىڭ دوتسەنتى كۋربانوۆ اگاپاشا, م.اۋەزوۆ اتىنداعى وڭتۇستىك قازاقستان مەملەكەتتىك ۋنيۆەرسيتەتى كافەدراسىنىڭ مەڭگەرۋشىسى ناديروۆ كازيم, ءتۇركىستان قالاسىنداعى ديزاينەرلەر وداعىنىڭ مۇشەسى حاماركۋلوۆ ناسىر «ءبىرلىك» التىن مەدالىمەن ماراپاتتالدى.
سونداي-اق, ءبىر توپ ازاماتقا ۇلتارالىق بىرلىككە سىڭىرگەن ەڭبەگى ءۇشىن «قازاقستان حالقى اسسامبلەياسىنا – 20 جىل» مەرەكەلىك مەدالى تابىس ەتىلدى.
بىرلىك كۇنى وبلىستىڭ قوعامدىق-ساياسي ومىرىنە بەلسەنە قاتىسقانى, دوستىق پەن ۇلتارالىق كەلىسىمدى نىعايتۋعا قوسقان ەلەۋلى ۇلەسى ءۇشىن وبلىستىق ەتنومادەني بىرلەستىكتەرگە وبلىس اكىمىنىڭ گرانتى تابىس ەتىلدى.
ەتنومادەني ورتالىقتاردىڭ اتىنان ە.رومانوۆا مەن ي.حاشيمجانوۆ ءسوز الىپ, ماڭگىلىك ەل مۇراتى بولعان وتانىمىزدىڭ بۇگىنى مەن كەلەشەگى كەمەل ەكەندىگىن ايتىپ, مەرەكەگە جينالعان جۇرتتى قۇتتىقتادى. انمەن, كۇيمەن استاسقان مەيرام وڭتۇستىكتە وسىلايشا اتالىپ ءوتىلدى.
باقتيار تايجان,
«ەگەمەن قازاقستان».
اقتاۋ
50-گە تارتا ۇلت وكىلدەرىن قۇتتى توسىندە توعىستىرىپ, ولاردىڭ شات تۇرمىسىنىڭ بەسىگىنە اينالعان ماڭعىستاۋدا بىرلىك مەرەكەسىن اتاپ ءوتۋ 1 مامىردان بىرنەشە كۇن بۇرىن باستالدى. مەكتەپ, كوللەدج وقۋشىلارىنىڭ ەتنومادەني بىرلەستىكتەردىڭ وكىلدەرىمەن تاقىرىپتىق كەزدەسۋى, ەتنومادەني بىرلەستىكتەر اراسىندا «بەلسەندى وتباسى» وتباسىلىق سايىسى, تۇرىكمەنستان دەلەگاتسياسىنىڭ قاتىسۋىمەن حالىقارالىق «مەن بەيبىتشىلىكتى تاڭدايمىن» اتتى بالالار سۋرەتتەرى كورمەسى مەن بايقاۋى, سونداي-اق, اقتاۋ, جاڭاوزەن قالالارىندا «تاتۋلىق-دوستىقتىڭ كيەلى بەسىگى» اتتى تۇرىكمەنستان ونەر جۇلدىزدارى جانە ماڭعىستاۋ ونەرپازدارىنىڭ بىرلەسكەن كونتسەرتى, «ىنتىماعى جاراسقان تاۋەلسىز ەلىم» اتتى مەكتەپ وقۋشىلارى اراسىندا ۇلتتار دوستىعى بايقاۋى, «بىرلىگىمىز جاراسقان!» اتتى جاستار بايقاۋى, سۋرەتشى جاستاردىڭ سۋرەت كورمەسى, سپورتتىق جارىستار سىندى ونداعان شارالار وبلىستىڭ اۋدان-قالالارىندا وتكىزىلدى.
مەرەكە كۇنگى شارا اقتاۋ قالاسىنداعى پرەزيدەنت داڭعىلى بويىندا ورنالاسقان «ماڭگىلىك الاۋ» كەشەنىنەن اقتاۋ قالاسى اكىمدىگى الدىنداعى استانا الاڭىنا دەيىن مەرەكەلىك شەرۋمەن باستالدى. بارابانشىلاردىڭ باستاۋىمەن ساپ تۇزەگەن شەرۋشىلەردى الدىمەن ەتنومادەني بىرلەستىكتەر وكىلدەرى, «نۇر وتان» پارتياسى وكىلدەرى, مەملەكەتتىك قىزمەتكەرلەر, ش.ەسەنوۆ اتىنداعى كمتجيۋ ۇجىمى, مۇنايشىلار مەن «اقتاۋ حالىقارالىق تەڭىز-ساۋدا پورتى», «ماەك-قازاتومونەركاسىپ», «قازتەلەكوم», وزگە دە ونداعان ۇجىمدار جالعادى. دوستىق, بىرلىك, بەيبىتشىلىك تاقىرىبىنداعى ۇرانداردى كوتەرىپ, جالاۋلاتا اۋقىمدى 35 توپ بولىپ ءجۇرىپ وتكەن شەرۋگە قاتىسۋشىلار سانى 5 مىڭعا جۋىقتادى.
سالتاناتتى شارادا ماڭعىستاۋ وبلىسىنىڭ اكىمى اليك ايدارباەۆ ەلباسى ن.نازارباەۆتىڭ ۇلتتار اراسىنداعى دوستىقتىڭ قازاقستاندىق مودەلىن قالىپتاستىرۋ مەن دامىتۋداعى ەرەن ەڭبەگىنىڭ ناتيجەسىندە بىرنەشە ۇلتتىڭ وكىلدەرى تاۋەلسىز قازاقستاندى دامىتۋ جولىندا ءبىر جەڭنەن قول, ءبىر جاعادان باس شىعارا قىزمەت ەتىپ جاتقاندىعىن, كيەلى ماڭعىستاۋ وڭىرىندە بۇل ءداستۇردىڭ ءوز ساباقتاستىعىن تاۋىپ وتىرعاندىعىن ايتا كەلىپ, بارشا ماڭعىستاۋلىقتاردى بىرلىك مەرەكەسىمەن قۇتتىقتادى جانە بۇدان بىلاي دا دوستىق پەيىلدەن جاڭىلماي, ەل ءۇشىن بىرلەسە قىزمەت ەتە بەرۋگە شاقىردى.
شەرۋ سوڭى مەرەكەلىك كونتسەرتكە ۇلاستى. ءار ۇلتتىڭ كورمەلەرىمەن بىرگە مەرەكەلىك ساۋدا-ساتتىق جارمەڭكەسى ۇيىمداستىرىلدى. مەرەكە اقتاۋ قالاسىنداعى «اقتاۋ», «بايتەرەك», «استانا», «دوستىق» ساۋدا-ويىن-ساۋىق ورتالىقتارىندا ءارتۇرلى ويىن-ساۋىق شارالارىمەن جالعاسىن تاپتى.
گۇلايىم شىنتەمىرقىزى,
«ەگەمەن قازاقستان».
سۋرەتتى تۇسىرگەن
تالانت قۇسايىن.
اقتوبە
كوكتەمنىڭ كۇنى جەر-اناعا بار مەيىرىمىن توگىپ, شۋاعىن شاشىپ, ك ۇلىمدەپ-اق تۇر. رەداكتسيا تاپسىرماسىمەن ءبىز ەرتە وياندىق پا دەسەك, بىزدەن ەرتە تۇرعاندار بارشىلىق ەكەن. ابىلقايىر حان باتىر ەسكەرتكىشى الدىنداعى الاڭعا كۇن كوتەرىلمەي-اق قاراقۇرىم حالىق جينالىپ قالىپتى. بۇلار 1 مامىر – قازاقستان حالقىنىڭ بىرلىگى كۇنىنە وراي ۇيىمداستىرىلعان «سەنىڭ مارافونىڭ – سەنىڭ جەڭىسىڭ» اتتى مارافونعا قاتىسۋشىلار بولىپ شىقتى. قالانىڭ كاسىپورىندارى مەن ۇيىمدارىنان جانە جوعارى وقۋ ورىندارى مەن كوللەدجدەردەن, مەكتەپتەردەن بارلىعى 4,5 مىڭ ادام قاتىسقان مارافوندا ەرلەر – 21, ايەلدەر – 10, ال بۇقارالىق مارافونشىلار 3 شاقىرىمعا جۇگىرىپ ءوتىپ, قازاقستان رەسپۋبليكاسىنىڭ تۇڭعىش پرەزيدەنتى ن.نازارباەۆ اتىنداعى ورتالىق ساياباققا جينالدى.
مۇندا دا مەرەكە الدەقاشان باستالىپ كەتكەن. تۇرلەنىپ-تۇلەپ كەتكەن ساياباق ورتاسىنداعى ۇلكەن ساحنادان سان ۇلتتىڭ اۋەزدى ءۇنى اسقاقتايدى. شايداي اشىق اسپاننان مەيىرىم توگىلۋدە. مەرەكەگە جينالعان حالىق ءنوپىرى ءسات سايىن تولىعا تۇسۋدە. ساۋدا قاتارلارى دا سان بوياۋعا مالىنعانداي ادەمىلەنىپ كەتكەن. ساحنادا دوستىق پەن بىرلىكتىڭ بەلگىسىندەي شاڭىراق كوتەرىلىپ, ونىڭ استىنا جينالعان وبلىستاعى ەتنومادەني بىرلەستىكتەردىڭ ۇلتتىق كيىمدەرىن كيگەن ونەرپازدارى مەرەكەنىڭ ءسانى مەن سالتاناتىن ارتتىرىپ تۇر. 1 مامىر – قازاقستان حالقىنىڭ بىرلىگى كۇنى مەرەكەسىنىڭ سالتاناتتى اشىلۋىندا وبلىس اكىمىنىڭ ورىنباسارى سارا نۇرقاتوۆا قىسقاشا ءسوز سويلەپ, ەلىمىزدەگى ۇلتارالىق دوستىق پەن بىرلىكتىڭ تەرەڭنەن تامىر تارتاتىنىن, وعان ەلباسى ن.نازارباەۆ ۇستانعان سارابدال ساياساتتىڭ بەرىك ىرگەتاسىن قالاپ وتىرعانىن جەتكىزدى. سودان كەيىن ەلىمىزدەگى تاتۋلىق پەن تۇراقتىلىققا ەلەۋلى ۇلەس قوسىپ جۇرگەن ەتنومادەني بىرلەستىكتەر توراعالارى مەن مۇشەلەرىنە «قازاقستان حالقى اسسامبلەياسىنا – 20 جىل» مەرەكەلىك مەدالىن تاپسىردى.
مەرەكەلىك سالتانات بارىسىندا مارافون جەڭىمپازدارى ماراپاتتالىپ, ولارعا اقشالاي جانە ەسكەرتكىش سىيلىقتار تارسىرىلدى.
مەرەكەلىك شاراعا جينالعاندارعا «دوستىق» وبلىستىق جانە «قازاقستان دوستىقتىڭ مەكەنى» اتتى ايماقتىق فەستيۆالدارىنىڭ لاۋرەاتتارىنىڭ گالا-كونتسەرتى ۇسىنىلدى. وبلىس ورتالىعىنداعى الاڭدار مەن اللەيالاردا دا كوكتەم شۋاعىمەن شىرايلانعان مەرەكەلىك كوڭىل-كۇي جالعاسىن تاپتى.
ساتىبالدى ءساۋىرباي,
«ەگەمەن قازاقستان».
اتىراۋ
جىل سايىن اتىراۋدا قازاقستان حالقىنىڭ بىرلىگى كۇنى مەرەكەسىن يساتاي مەن ماحامبەت باتىرلار ەسكەرتكىشى بوي كوتەرگەن الاڭدا اتاپ وتەدى. بۇل جولى دا سولاي بولدى. جۇرتشىلىق ەرتەڭگىلىك اتالعان الاڭعا قاراي توپ-توبىمەن اعىلدى. ۇلتتىق كيىمدەرىن كيىپ, ءبىر-ءبىرىن قول الىسىپ, ءتوس قاعىستىرعان ءتۇرلى ەتنوس وكىلدەرى ءبىر-بىرىمەن ايتۋلى مەرەكەمەن قۇتتىقتاپ جاتتى. ايتقانداي, وڭىردە 17 ەتنومادەني بىرلەستىك وكىلدەرى تاتۋلىق پەن تۇراقتىلىقتى, دوستىق پەن بىرلىكتى نىعايتۋعا لايىقتى ۇلەسىن قوسىپ كەلەدى. الاڭعا جينالعان جۇرتشىلىقتى وبلىس اكىمى باقتىقوجا ىزمۇحامبەتوۆ قۇتتىقتاپ, ەل بىرلىگىنىڭ ماڭىزىنا كەڭىنەن توقتالدى. ءوڭىردىڭ ءبىر توپ سوعىس جانە ەڭبەك ارداگەرىنە مەملەكەتتىك ماراپاتتار تاپسىردى. سونىمەن بىرگە, ەل بىرلىگىن نىعايتۋ, بەيبىتشىلىك پەن كەلىسىمدى ساقتاۋ جانە رۋحاني مادەنيەتتى دامىتۋعا قوسقان ۇلەسى ءۇشىن «بىرلىك» التىن مەدالىنە «تاتۋلىك» تاتار-باشقۇرت ەتنومادەني بىرلەستىگىنىڭ جەتەكشىسى گۇلسينا بايكەنوۆا مەن «اليا» ەۆرەي ەتنومادەني بىرلەستىگىنىڭ جەتەكشىسى پاۆەل تكاچ يە بولدى.
– ءبىزدىڭ ەلىمىز تاۋەلسىزدىگىن العالى بەرى كوپتەگەن جەتىستىككە قول جەتكىزدى. قازىرگى تاڭدا الەۋمەتتىك-ەكونوميكالىق جاعدايىمىز جاقسارا ءتۇستى. ەلىمىزدەگى بارلىق ەتنوس وكىلدەرى ءبىر-بىرىمەن تاتۋ, ءوز ءتىلىن, مادەنيەتىن دامىتۋعا مۇمكىندىك الدى. سونىمەن بىرگە, ءبارى دە مەملەكەتتىك ءتىلدى قۇرمەتتەيدى. ەلدەگى تاتۋلىقتىڭ نىعايعانى بيىلعى پرەزيدەنت سايلاۋىندا جانە ءبىر رەت دالەلدەندى, – دەيدى «تاتۋلىك» تاتار-باشقۇرت ەتنومادەني بىرلەستىگىنىڭ جەتەكشىسى گۇلسينا بايكەنوۆا.
بۇل كۇنى ەتنومادەني بىرلەستىكتەردىڭ مۇشەلەرى اۋەلەتە ءان سالدى, مىڭ بۇرالا بي بيلەدى. ولار تەك ءوز تىلدەرىندە عانا ەمەس, قازاق اندەرىن دە شىرقادى.
جولداسبەك شوپەعۇل,
«ەگەمەن قازاقستان».
كوكشەتاۋ
اقمولا وڭىرىندەگى بيىلعى 1 مامىر مەرەكەسى «قازاقستان حالقىنىڭ دوستىعى» اتاۋىنداعى كەڭ اۋقىمدى فەستيۆال رەتىندە اتاپ ءوتىلدى. التىن كۇن شاپاعىنا بولەنگەن كەربەز كوكشەتاۋ بار جاساۋىمەن جارقىراپ تۇر. كوشەلەر مەن الاڭداردا وبلىس اۋماعىنداعى تاتۋ-ءتاتتى تىرشىلىك كەشىپ وتىرعان ەتنوس وكىلدەرىنىڭ بارلىعى وزدەرىنىڭ ۇلتتىق كيىمدەرىمەن سالتانات قۇرىپ, ءان-بيدەن شاشۋ شاشۋدا.
فەستيۆال ابىلاي حان الاڭىنداعى 300 مەكتەپ وقۋشىسىنىڭ «بەيبىتشىلىك پەن دوستىق – بالالار كوزىمەن» اتتى اسفالتتاعى سۋرەت كونكۋرسىمەن باستالۋى ايرىقشا ماڭىزدى دەر ەدىك. ماسەلەن, قالاداعى №12 مەكتەپتىڭ سۋرەت-سىزۋ ءپانىنىڭ مۇعالىمى, رەسپۋبليكا وقۋ-اعارتۋ ءىسىنىڭ ۇزدىگى ءمۇتاللاپ يسقاقوۆ ءوزىنىڭ 24 وقۋشىسىنىڭ «مەنىڭ قازاقستانىم!» تاقىرىبىنداعى سۋرەتتەرىنەن بالالار قيالىنداعى ەرتەڭگى ماڭگىلىك ەلدى كورۋگە بولاتىنىن ايتادى. مۇندايدا ەسكەرتكىش تۇعىرداعى ابىلاي بابامىز دا «بارەكەلدىسىن» بىلدىرگەندەي بويىڭدى جىلى سەزىم كەرنەيدى. بۇل اسەردى ابىلاي حان مەن تاۋەلسىزدىك الاڭدارىن جالعاستىراتىن اللەياداعى قىلقالام شەبەرلەرى مەن ديزاينەرلەردىڭ, ساۋلەتشىلەردىڭ ينتەللەكتۋالدى «دوستىق داڭعىلى» شىعارماشىلىق كورمەسى دە قالىڭداتا تۇسەدى.
كوكشە تورىندە ەلىمىزدىڭ ءانۇرانى قالىقتادى. تاۋەلسىزدىك الاڭىنداعى شادىمان جۇرتقا وبلىس اكىمى سەرگەي كۋلاگين ءسوز ارناپ, اقمولالىقتاردىڭ مەرەكەلى جىلعى ەڭبەك تابىستارىنا, قوعامدىق جانە ساياسي ومىردەگى بەلسەندىلىگىنە ريزاشىلىعىن ءبىلدىردى. سونداي-اق, ول قازاقستان حالقى اسسامبلەياسى كەڭەسىنىڭ شەشىمىمەن ءبىر توپ ازاماتقا «بىرلىك» التىن مەدالى مەن «قازاقستان حالقى اسسامبلەياسىنا – 20 جىل» مەرەكەلىك مەدالدارىن تابىس ەتتى. فەستيۆالعا قاتىسۋشىلاردى ەتنومادەني ورتالىقتاردىڭ باسشىلارى مەن بەلسەندىلەرى قىزۋ قۇتتىقتادى.
اۋقىمدى شارادا كوكشەلىكتەر نازارىنا التى تاريحي تارماقتان تۇراتىن تەاترلاندىرىلعان كورىنىس ۇسىنىلدى. كوز الدىمىزدا قازاق حاندىعىنىڭ قۇرىلۋىنىڭ, دەپورتاتسياعا ۇشىراعان ۇلتتار مەن ۇلىستاردىڭ قازاق جەرىن مەكەندەۋىنىڭ, ۇلى وتان سوعىسىنداعى جەڭىسىمىزدىڭ, تىڭ يگەرۋ كەزەڭىنىڭ, بۇگىنگى شات تۇرمىسىمىزدىڭ شەجىرەسى جىلجىپ ءوتىپ جاتىر. بۇل شەرۋ بولاشاق ماقساتتارمەن ۇشتاسىپ كەتەتىندىگىمەن دە عاجاپ.
مەرەكە حالىق دوستىعىنىڭ ورتاق داستارقان بايلىعىمەن, كەڭ كولەمدى كونتسەرتتىك باعدارلامالارمەن جالعاستى.
اۋداندارداعى الاقاي مەيرام دا تانىمدىق سيپات الدى.
باقبەرگەن امالبەك,
«ەگەمەن قازاقستان».
سۋرەتتى تۇسىرگەن
تولەگەن قوسشىعۇلوۆ.
قاراعاندى
ەلىمىز ومىرىندەگى قۋانىشتى وقيعاعا تابيعات ءوزى دە سىي جاساعانداي مامىردىڭ العاشقى كۇنى نۇرىن مولىنان توگىپ, ادامدار مەن قالا اجارىن ودان سايىن جايناتىپ جىبەردى. جان-جاقتان اعىلعان قاۋىم قاتارى مەجەلى ۋاقىتتا قالىڭداي ءتۇسىپ, ۇزىننان-ۇزاق بۇقار جىراۋ داڭعىلى لىق تولدى. قولتىقتاسا ساپ تۇزەپ, ءار تىلدە قوسىلا ءان شىرقاپ, باقىتتى تۇرمىس پەن تاتۋ-ءتاتتى ومىرگە شاتتىق ەسكەن شەرۋ كوتەرىڭكى كوڭىل كۇيمەن العا باستى. ورتاق تىلەك, ءبىر ماقسات توعىستىرعان مەرەكەلىك سالتاناتقا قاتىسۋشىلار «العا, قازاقستان!», «ءبىز نازارباەۆپەن ءبىرگەمىز!» دەپ ءبىر كىسىدەي ءۇن تاستاپ, ءتاۋەلسىزدىك ەسكەرتكىشىن گۇل شوقتارىنا كومكەردى.
وبلىس اكىمى نۇرمۇحامبەت ابدىبەكوۆ بىرلىك پەن تۇتاستىقتىڭ, دوستىق پەن ىنتىماقتىڭ مەرەيلى مەرەكەسىمەن قۇتتىقتاپ, ەلباسى اتىنان ءار وتباسىنا قۇت-بەرەكە, جارقىن بولاشاق تىلەدى. شەرۋشىلەر كەۋدەلەرى جاۋىنگەرلىك ماراپاتتارعا تولى سوعىس ارداگەرلەرىنە باس ءيىپ, قۇرمەت كورسەتتى. ايماق باسشىسى ۇلتتار اراسىنداعى باۋىرلاستىققا, قوعامدىق كەلىسىمگە ۇيىستىرۋشى بىرقاتار ەتنومادەني بىرلەستىكتەرگە وبلىس اكىمىنىڭ گرانتىن تاپسىرىپ, بەلسەندى مۇشەلەرىنە مەرەيتويلىق مەدالدار تابىس ەتتى.
– ءبارىمىز شىنايى رازىلىقپەن داۋىس بەرىپ, قايتادان سايلانعان ەلباسىمىز تۇراقتىلىق پەن دامۋدىڭ كەپىلى. سوندىقتان ءبىز ن.ءا.نازارباەۆتى ءاردايىم قولدايمىز, – دەدى وبلىستىق ليتۆان «ليتۋانيك» ۇيىمىنىڭ جەتەكشىسى, قازاقستان حالقى اسسامبلەياسىنىڭ مۇشەسى ۆيتالي تۆاريوناس.
10 مىڭنان استام ادام باس قوسقان شەرۋ سالتاناتى قالانىڭ بارلىق ءبولىگىندە جالعاستى. اۋداندار ورتالىقتارى مەن كەنتتەردە دە مەرەكەلىك شەرۋلەر بولىپ ءوتتى. كەشكىلىك تۇنگى اسپاندى وتشاشۋلار جارقىراتتى.
ايقىن نەسىپباي,
«ەگەمەن قازاقستان».
قوستاناي
1 مامىر – قازاقستان حالقىنىڭ ءبىرلىگى كۇنى قوستاناي قالاسى جۇرتشىلىعىنىڭ كوپتەن كۇتكەن مەرەكەسى. اۋا رايى دا ادامداردىڭ دوستىق كوڭىل كۇيىندەي رياسىز شۋاعىن توكتى. كوپتەن بەرى قۇبىلعان كوكتەمنىڭ كۇنى جارقىراپ, كوك زەڭگىر اسپان تۇپ-تۇنىق بولىپ تۇر. جەر-دۇنيە جاسىل تۇسكە ەنىپ, قۇلپىرا تۇسكەن. تال-تەرەك بۇرشىك اتىپ, قايىڭ سىرعا تاقتى. ورتالىقتا مەرەكەلىك دۋمان تاڭەرتەڭنەن باستالدى. قازاقتىڭ جانە ءتۇرلى ۇلتتاردىڭ ءان-كۇيى مەرەكەنىڭ شاتتىعىن ەسەلەدى. ورتالىقتا ۇيىمداستىرىلعان ءتۇرلى ۇلتتاردىڭ مۋزىكالىق اسپاپتارى كورمەسىن تاماشالاعاندار ولاردان توگىلگەن شىعارمالاردى تازا تابيعي كۇيىندە تىڭدادى.
– «ونەردە شەكارا جوق» دەگەن راس. مەرەكەگە كەلىپ قانشاما ۇلتتىڭ بۇرىن ءوزىم كورمەگەن مۋزىكالىق اسپاپتارىن تاماشالادىم. ماعان ءوزىمىزدىڭ دومبىرا, قوبىزىمىز جانە قاتار جۇرگەن ورىستىڭ, تاتاردىڭ سىرنايى مەن بالالايكاسى تانىس ەدى. ال ارميانداردىڭ, كورەيلەردىڭ, چەشەندەردىڭ, ازەربايجانداردىڭ, تاعى باسقالاردىڭ اسپاپتارىن ءبىرىنشى رەت كورگەنىمدى دە جاسىرمايمىن. قىرعىزدىڭ قومىزىن قىرعىز بالاعا ويناتىپ ءبىراز تىڭدادىم. كورەيدىڭ باراباندارىن ءوزىمىزدىڭ قوستانايلىق قىزدار قالاي ادەمى ۇرادى, – دەپ ادەمى اسەرىن ءبولىستى قوستاناي قالاسىنىڭ تۇرعىنى جامال مەدەباەۆا اپاي.
سونىمەن قاتار, مەرەكەگە جينالعان قوستانايلىقتار ءار ۇلتتىڭ ىدىستارىن دا تاماشالادى.
– بيىلعى مەرەكە قازاقستان حالقى اسسامبلەياسىنىڭ, كونستيتۋتسيامىزدىڭ – 20, جەڭىستىڭ – 70 جانە قازاق حاندىعىنىڭ 550 جىلدىعىمەن تۇسپا-تۇس كەلدى. سوندىقتان ءبىز بيىل بۇل مەرەكەنىڭ تانىمدىق جاعىنا كوپ كوڭىل بولدىك. ءتۇرلى ۇلتتار مۋزىكالىق اسپاپتارىمەن قاتار, ءتۇرلى ۇلتتاردىڭ پايدالاناتىن ىدىستارى كورمەسىن دە ۇسىنىپ وتىرمىز. بارلىق جاقسى قاسيەت وتباسىنان داريدى. داستارقان باسىندا بەرەكە بولسا, ەلىمىزدە دە تىنىشتىق, بەيبىتشىلىك بولادى دەپ تۇيدىك. ىدىستار تاريحىن تاماشالاعاندار كوپ, – دەيدى وبلىستىق مادەنيەت باسقارماسىنىڭ باسشىسى لاريسا سەروۋس.
بالالاردىڭ تاسجولعا سالعان سۋرەتى مەرەكە ءسانىن دە, ءمانىن دە ارتتىرا ءتۇستى. حالىقتىق ءان-بي, ويىندار دوستىق پەن بىرلىكتىڭ سالتاناتىنداي كورىندى.
ءنازيرا جارىمبەتوۆا,
«ەگەمەن قازاقستان».
قىزىلوردا
بەرەكە مەن بىرلىكتىڭ تۋى جەلبىرەپ, ەڭبەك پەن دوستىقتىڭ كۇيىن شەرتەتىن عاجايىپ مەزگىلدى سىر جۇرتشىلىعى دا اسىعا كۇتەدى. «بىرلىك پەن تاتۋلىق مەكەنى – قازاقستان». «تىلەگى ءبىردىڭ جۇرەگى ءبىر». «بىرلىگى جاراسقان قازاقستان!» دەپ ۇرانداعان قىزىلوردالىقتار مەرەكەنى تويلاۋدى كۇنمەن تالاسىپ باستاپ كەتتى.
ەڭ الدىمەن, بارلىق مەكەمەلەردىڭ قاتىسۋىمەن شەرۋ ۇيىمداستىرىلدى. ەڭبەك ادامدارىنان باستاپ, ەلدىڭ دامۋىنا وزىندىك ۇلەس قوسىپ جۇرگەن ازاماتتار بىرلىكتىڭ تۋىن جەلبىرەتىپ شەرۋگە قاتىستى.
مۇنان سوڭ تاتۋلىعى تۇعىرلى, بىرلىگى بەرەكەلى, تىرلىگى مەرەكەلى سىر ەلىنىڭ حالقىن وبلىس اكىمى قىرىمبەك كوشەرباەۆ قۇتتىقتادى.
– ءبىز ءبىر ماقسات, ءبىر مۇددە, ءبىر بولاشاق جولىنا جۇمىلعان قۋاتتى ەلمىز. قوعامدىق كەلىسىم مەن ساياسي تۇراقتىلىق – ءبىزدىڭ ەڭ جوعارى بايلىعىمىز. بۇل جەتىستىكتى باعالاۋ, ونى ساقتاۋ جولىندا ايانباي ەڭبەك ەتۋ – ءاربىر قازاقستان ازاماتىنىڭ مىندەتى. تۋعان جەردىڭ توسىندە, بەيبىت ەلدىڭ ءىشىندە ەل بىرلىگىن ساقتاۋعا اتسالىسايىق! بەيبىت ءومىردىڭ بەرەكەسى, حالقىمىزدىڭ ىنتىماق, بىرلىگى ارتا بەرسىن,– دەدى ايماق باسشىسى.
ۇلتتار تۇتاستىعى مەن حالىقتار دوستىعىنىڭ ارقاسىندا بۇگىندە مەملەكەتىمىز وركەندەپ, ىلگەرى باسىپ كەلەدى. سىر ەلىندە 70-كە جۋىق وزگە ۇلت پەن ۇلىستىڭ وكىلدەرى تۇرادى. 11 ەتنومادەني ورتالىق بار. بارلىعى مەرەكە كۇنى كونتسەرتتىك باعدارلاما دايىنداپ, بىرلىكتىڭ بەكەمدىگىن كورسەتتى.
وبلىستىڭ بارلىق قالا, اۋدان, اۋىلدارىندا مەرەكە جوعارى دەڭگەيدە اتالىپ ءوتتى, ءتۇرلى سپورت سايىستارى, فلەشموب ۇيىمداستىرىلدى.
ەرجان بايتىلەس,
«ەگەمەن قازاقستان».
ورال
1 مامىر – قازاقستان حالقى ءبىرلىگى كۇنى اقجايىق اسپانىنان كۇن شۋاعى مولىنان توگىلىپ, باتىسقازاقستاندىقتاردىڭ كوڭىل-كۇيى دە تابيعاتپەن ۇندەستىك تاپقانداي وتە كوتەرىڭكى بولدى. وسىنداي شات-شادىمان احۋال اۋانى ورال قالاسى مەن وبلىس اۋداندارىندا وتكىزىلگەن مەرەكەلىك شەرۋلەر كەزىندە دە ايقىن اڭعارىلىپ تۇردى. ونىڭ سوڭى كونتسەرتتىك باعدارلامالار مەن جارمەڭكەلەرگە ۇلاستى.
ءبىرىنشى مامىر كۇنى قارساڭىندا ورال وڭىرىندە بارلىق تۇرعىنداردى بىرلىك پەن تاتۋلىققا جانە ىنتىماققا ۇندەيتىن ءارى وسى ءۇش تۇعىردى ودان ءارى تەرەڭدەتە تۇسە الاتىن ءمانى مەن ماعىناسى زور ءىس-شارالار كەشەنى مارەگە جەتتى. سونىڭ ءبىرى – قازاقستان حالقى اسسامبلەياسى جىلىنا وراي وبلىستا ۇيىمداستىرىلعان «بەيبىتشىلىك پەن كەلىسىمنىڭ جول كارتاسى» ەستافەتاسى.
بۇل مەرەكەلىك مەگاجوبا بيىلعى جىلدىڭ اقپان ايىندا باستاۋ الىپ, وسى رياسىز راسىمگە ساي ورال قالاسىنىڭ دەلەگاتسياسى زەلەنوۆ اۋدانىنا ەستافەتانى تاپسىرعان بولاتىن. سول ۋاقىتتان بەرى بۇل يگى ءىس كوپ ەتنوستى ءوڭىردىڭ بارلىق تۇپكىرلەرى مەن ەلدى مەكەندەرىن قامتىپ, تۇرعىنداردىڭ ىنتىماعىن ارتتىرىپ, ولاردىڭ اراسىنداعى مادەني-الەۋمەتتىك بايلانىستاردى ودان ءارى جەتىلدىرۋگە ىقپال جاسادى. وسىلايشا كەشە مەرەكەلىك ەستافەتانى تەرەكتى اۋدانىنىڭ دەلەگاتسياسى ورال قالاسىنا قايتا جەتكىزدى.
ءبىز بىرلىك كۇنى ورال قالاسىنىڭ ورتالىق الاڭى ارقىلى مەرەكەلىك شەرۋدەن ءجۇرىپ وتكەن ءبىر جاس تۇرعىندى سوزگە تارتقان ەدىك. ول ءوزىن يگور سپيريدونوۆ, باتىس قازاقستان وبلىستىق قازاقستان حالقى اسسامبلەياسى جانىنداعى جاستار قاناتىنىڭ توراعاسىمىن دەپ تانىستىردى. كوزىندە وت, بويىندا جىگەر مەن قايرات بىردەن بايقالاتىن جاس ورەن بىزگە ءوز تىلەگىن بىلايشا جەتكىزدى: «جىل سايىن 1 مامىر كۇنى كەلەتىن قازاقستان حالقى بىرلىگى كۇنىن ايرىقشا تەرەڭ سەزىممەن قارسىلايمىن. جاستار ەلدىڭ ۇلكەن ءۇمىت ارتاتىن ستراتەگيالىق رەسۋرسى. مەن ءوزىمنىڭ تاۋەلسىز قازاقستاندا تۇرىپ ءومىر ءسۇرىپ جاتقانىمدى ۇنەمى ماقتانىش ەتەمىن. سونداي-اق, قاشاندا مەملەكەت باسشىسى ساياساتىن قولدايتىن بەلسەندى جاستار قاتارىندا جۇرگىم كەلەدى. ءبىز ساپالى ءبىلىم الىپ, ينتەللەكتۋالدىق مۇمكىندىگىمىزدى دامىتۋعا مۇددەلىمىز. قازىر قازاقستان حالقى اسسامبلەياسىنىڭ جاستار قاناتى پرەزيدەنت بەلگىلەگەن بەيبىتشىلىك پەن كەلىسىم باعىتىن ىسكە اسىرۋ ءۇشىن سەرپىندى ىستەرگە باستاماشى بولىپ وتىر».
تەمىر قۇسايىن,
«ەگەمەن قازاقستان».
وسكەمەن
شىعىس جۇرتشىلىعى ەلىمىزدىڭ بىرلىك كۇنىن – «مەن – قازاقستاننىڭ پاتريوتىمىن!» سالتاناتتى شەرۋىمەن قارسى الدى. وبلىس ورتالىعىنداعى مەرەكەلىك شەرۋگە 15 مىڭنان استام قالا تۇرعىندارى مەن قوناقتارى قاتىستى. ءوڭىردىڭ بارلىق اۋداندارى مەن قالالارىندا, اۋىل-ايماقتارىندا ايرىقشا ءسان-سالتاناتىمەن وتكەن مەرەكەدە وسكەمەندىكتەر استانا كوشەسىنەن باستاپ رەسپۋبليكا الاڭىنا دەيىن شەرۋ ۇيىمداستىردى. 5518 اسكەري ءبولىمىنىڭ وركەسترى باستاعان سالتاناتتى شەرۋگە ءتۇرلى ەتنومادەني بىرلەستىكتەردىڭ وكىلدەرى, بايكەرلەر مەن «بيپەك اۆتو» اۆتوكولىكتەر كەرۋەنى, «كازتسينك», ءۇلبى مەتاللۋرگيا زاۋىتى, وسكەمەن تيتان-ماگني كومبيناتى, «ازيا اۆتو» سىندى وڭىردەگى 88 كاسىپورىن مەن ۇيىمداردىڭ جۇمىسشىلارى, مەملەكەتتىك مەكەمەلەردىڭ قىزمەتكەرلەرى, جوعارى جانە ورتا وقۋ ورىندارىنىڭ ستۋدەنتتەرى, مەكتەپ وقۋشىلارى قاتىستى.
– ەلىمىزدىڭ باعا جەتپەس بايلىعى – بەرەكەسى مەن بىرلىگى جاراسقان, تاتۋلىق پەن كەلىسىمنىڭ تۋىن تىككەن كوپۇلتتى حالقى. بۇل – قازاقستان حالقىنىڭ مىزعىماس دوستىعىنىڭ, وتانعا دەگەن ماڭگىلىك ماحابباتىنىڭ مەرەكەسى, – دەدى ايماق جۇرتىن قۇتتىقتاعان ءوڭىر باسشىسى دانيال احمەتوۆ.
شەرۋگە قاتىسۋشىلار قازاقستان حالقى اسسامبلەياسىنىڭ 20 جىلدىق مەرەيتويىنا وراي اسپانعا 20 اق كوگەرشىن مەن 20 مىڭ شار ۇشىردى. بىرلىك كۇنى مەرەكەلىك كونتسەرتكە ۇلاسىپ, دوستىقتى تۋ ەتكەن ونەرپازدار ءوڭىر جۇرتشىلىعىن ءان-بيىمەن قۋانتتى. گىر تاسىن كوتەرۋ, قول كۇرەس, ارقان تارتۋ, شاحمات جانە دويبى ويىندارىنان سايىستار ءوتتى. سونداي-اق, بۇل كۇنى «مەتاللۋرگ», «جاستار», «ساۋلەتاي» جانە جامبىل اتىنداعى ساياباق سىندى كوپشىلىك دەمالىس ورىندارى اشىلدى. سايلاۋعا بەلسەنە قاتىسقان وقۋ ورىندارى ماراپاتتالدى. مەرەكە كەشكىلىك «ستۋدەنت كوكتەمى» گالا-كونتسەرتىمەن, جاستاردىڭ بي كەشىمەن جالعاستى.
دۋمان اناش,
«ەگەمەن قازاقستان».
پاۆلودار
بيىلعى 1 مامىر – قازاقستان حالقىنىڭ بىرلىگى كۇنى مەرەكەسى, تاتۋلىق پەن تۇراقتىلىق تاقىرىبىنا ارنالدى. كۇن دە جىلىندى. اينالا قۇلپىرىپ جايناپ تۇر. اسەم اۋەندەر شالىقتاپ, بۇكىل قالانى مەرەكەلىك كوڭىل-كۇي دۋمانعا بولەگەن.
ال, وسىدان ءبىر كۇن بۇرىن وبلىس ورتالىعىنداعى دوستىق ۇيىندە وبلىس اكىمى قانات بوزىمباەۆ ءوڭىردىڭ ەتنومادەني بىرلەستىكتەرىنىڭ باسشىلارىنا ارنايى گرانتتار تابىس ەتتى. بىرلىك كۇنى مەرەكەسىنە وراي قۇرامىندا موردۆا, ۋدمۋرت, كومي-پەرمياك, ماري, ۆەنگر ۇلتتارى وكىلدەرى بار فينۋگور ەتنومادەني ورتالىعى اشىلدى. ۋدمۋرتيادان قوناقتار كەلىپ, ەتنومادەني بىرلەستىك اشىلۋىنا وراي, الاڭ ورتاسىندا تولقي ءسوز سويلەدى.
وسى جاقسى جاڭالىقتاردىڭ سوڭى كەشە قالا تۇرعىندارى, قوناقتارى ورتالىق الاڭ مەن ەرتىس وزەنى جاعالاۋىندا, قالالىق مادەنيەت جانە دەمالىس ساياباعىندا جالعاسىپ, قىزىققا تولى دۋماندى مەرەكەلىك شارالارعا تولى بولدى. مەرەكەنىڭ «تىلەگىمىز – تاتۋلىق, تىرەگىمىز – تۇراقتىلىق» تاقىرىبىنا ساي ەكران ارقىلى ارنايى جاسالعان مەرەكەلىك جۋرنال پاراقتارى اشىلدى. قازاقستان حالقى اسسامبلەياسىنىڭ 20 جىلدىعىنا وراي ەتنومادەني بىرلەستىكتەر جانە قالا جاستارىنىڭ قاتىسۋىمەن تەاترلاندىرىلعان قويىلىم, ەتنومادەني بىرلەستىكتەردىڭ كونتسەرتى جانە يسا بايزاقوۆ اتىنداعى وبلىستىق فيلارمونيانىڭ كونتسەرتتىك باعدارلاماسى ۇسىنىلدى.
ورتالىق الاڭدا حالىق كوپ. وبلىس باسشىلىعى, سوعىس جانە ەڭبەك ارداگەرلەرى قۇتتىقتاۋ سوزدەرىن ارناۋدا. مەرەكەنىڭ ءسان سالتاناتىن قىزىقتاعان ۇلكەندەر, ءان شىرقاپ, بي بيلەپ قۋانىشتى جاستار, قىزىل-جاسىل شارلار كوتەرگەن كىشكەنتاي بوبەكتەر اينالا دۋمان ءسانىن كەلتىردى. ساعات تۇسكى 12.00-دە ورتالىق الاڭدا ەتنومادەني بىرلەستىكتەردىڭ قولدانبالى شىعارماشىلىق جانە ءداستۇرلى اسپازدىق «ەتنوقالاشىق» شەبەرلىك كورمەسى ءوتتى. بالالار ءۇشىن شاپيتو تسيركىنىڭ مەرەكەلىك باعدارلاماسى, ەكزوتيكالىق جانۋارلار مەن حايۋانداردىڭ زووپاركى اشىلدى. جاعالاۋدا سپورتتىق ويىن-ساۋىق باعدارلاماسى قىزسا, «تاتۋلىقتىڭ تۇتقاسى, بىرلىكتىڭ بەسىگى», قالالىق مادەني ساۋىق ورتالىعى مەن بالالار شىعارماشىلىق جانە تاربيە ورتالىعى ۇيىمدارىنىڭ «بەيبىت بولسىن بولاشاق» مەرەكەلىك كونتسەرتتىك باعدارلاماسىمەن جاراسىم تاپتى.
فاريدا بىقاي,
«ەگەمەن قازاقستان».
پەتروپاۆل
قازاقستان حالقىنىڭ بىرلىگى كۇنى قىزىلجار وڭىرىندە دە دوستىق پەن تاتۋلىقتىڭ, بەيبىتشىلىك پەن مىزعىماس تۇراقتىلىقتىڭ مەرەكەسى رەتىندە كوتەرىڭكى كوڭىلمەن, جارقىن جۇزبەن اسقاق رۋحتا اتالىپ ءوتتى. ادامدار ءبىر-بىرىنە اماندىق, ساۋلىق جولداپ, ەلىمىزدىڭ ايبارى اسقاقتاي بەرۋىن تىلەدى. قازاقستان حالقى اسسامبلەياسىنىڭ 20 جىلدىق مەرەيتويىمەن تۇسپا-تۇس كەلگەن مەرەكە ەل دامۋىنىڭ قارىشتى قادامى, بەدەل-ابىرويىمىزدىڭ اسقاقتاۋ, ءار شاڭىراققا شاتتىق قونعان, ۇلتتار مەن ۇلىستاردى ۇيىستىرعان مەيرام رەتىندە باعالانىپ, ۇلتتىق قۇندىلىقتارىمىزدىڭ قادىر-قاسيەتتەرى ۇلىقتالدى.
مەرەكە سالتاناتى تاۋەلسىزدىك ستەلاسى جانىنان باستالدى. وندا وبلىس اكىمى ەرىك سۇلتانوۆ تۇرعىندارعا جىلى لەبىزگە تولى قۇتتىقتاۋىن ارناپ, ەلباسى اتىنان 36 سولتۇستىكقازاقستاندىققا «قازاقستان حالقى اسسامبلەياسىنا – 20 جىل» مەرەكەلىك مەدالىن تابىس ەتتى.
قالانىڭ بارلىق شاعىن اۋداندارىندا ۇيىمداستىرىلعان مەرەكەلىك باعدارلامالاردى قىزىقتاعان جۇرتشىلىق قاتارى قالىڭ بولدى. دوستىق ۇيىندە وتكەن «حالىقتىڭ اسىل قازىناسى» اتتى بايقاۋعا 19 ەتنوستىق كلۋب قىزىعۋشىلىق كورسەتىپ, ءوز نومىرلەرىندە ورتاق شاڭىراق استىندا ءبىر ءۇيدىڭ بالاسىنداي, ءبىر قولدىڭ سالاسىنداي تاتۋ-ءتاتتى ىنتىماقتا ءومىر ءسۇرىپ جاتقان ۇلىستاردىڭ باياندى تىرلىگىن, بەرىك بىرلىگىن ارقاۋ ەتتى. «قوعامدىق كەلىسىم» مەكەمەسى ۇيىمداستىرعان «ماڭگىلىك ەل: ءبىر ەل – ءبىر تاعدىر» كونكۋرسى كوپشىلىك تالعامىنان شىقتى. وندا بالالار ءارتۇرلى تاقىرىپتار بويىنشا سۋرەت سالۋدان سىنعا ءتۇسىپ, شىعارماشىلىق قارىم-قابىلەتتەرىن تانىتتى. اباي مەن پۋشكين ەسكەرتكىشى قاسىندا «دوستىقتىڭ ساز الەمى» مۋزىكالىق-بي كومپوزيتسياسى قانات قاقسا, «اسسامبلەيا ارۋى» اتتى ءتۇرلى ەتنوستاردىڭ ادەمى ارۋلارى قاتىسقان بايقاۋ دا ءوز كورەرمەندەرىن ريزا ەتتى. دەمالىس جانە مادەنيەت ساياباعىندا ستۋدەنت-جاستار «دوستىق دارحانى» فلەش-موب, قىزىقتى كونكۋرستار ۇيىمداستىردى.
مەرەكەنىڭ ءسانىن قازاقستاندىقتاردىڭ تاتۋلىعى مەن كەلىسىمىن پاش ەتكەن كەشكى مەرەكەلىك كونتسەرت كەلتىردى. ول شىن مانىندەگى دوستىق ءان-جىر, بي ارقاۋىنا اينالىپ, قىر بەتىن قىزعالداققا تولتىرىپ جىبەرگەندەي اسەرگە بولەدى.
ءومىر ەسقالي,
«ەگەمەن قازاقستان».
سۋرەتتى تۇسىرگەن
تالعات تانىباەۆ.
تالدىقورعان
جەتىسۋ جەرىندە ىنتىماعى جاراسىپ, بىرلىكتەرى نىعايىپ, باقۋاتتى ءومىر ءسۇرىپ جاتقان 103 ەتنوس وكىلى تالدىقورعانداعى ورتالىق الاڭعا كوپتەپ جينالدى. ادامدار اراسىنداعى قۋانىشتى تابيعات-انا دا قۇپ كورسە كەرەك, اسپان استى شايداي اشىق. اۋادا ءلۇپ ەتكەن جەل دە جوق.
ءسانى مەن سالتاناتى ارتقان جەتىسۋلىقتاردىڭ الدىنا الماتى وبلىسىنىڭ اكىمى اماندىق باتالوۆ شىعىپ: «بۇگىنگى قۋانىش – وتانعا دەگەن پاتريوتتىق سەزىم مەن سۇيىسپەنشىلىكتىڭ, تۇراقتىلىق پەن كەلىسىم مەرەكەسى. قازاقستان – بەرەكە مەن بىرلىكتىڭ, دوستىقتىڭ مەكەنى. مۇندا ءبىر شاڭىراق استىندا كوپتەگەن ۇلتتار مەن ۇلىستار تاتۋ-ءتاتتى عۇمىر كەشۋدە. سوندىقتان دا ەلىمىزدەگى قوعامدىق كەلىسىم مەن ساياسي تۇراقتىلىقتى الەم باعالاپ, مويىنداپ وتىربۇكىل الەم ەلباسىمىز نۇرسۇلتان نازارباەۆتىڭ كەمەڭگەر كوشباسشى, ساڭلاق ساياساتكەر ەكەندىگىن تاعى ءبىر مويىندادى. پرەزيدەنتتىك سايلاۋ ەلدىڭ بىرلىگى مەن تۇراقتىلىعىن نىعايتا ءتۇستى. حالقىمىز ءوزىنىڭ نۇرلى بولاشاعىن تۇڭعىش پرەزيدەنتپەن بايلانىستىراتىنىن كورسەتتى. تاۋەلسىزدىك جىلدارى قازاقستاننىڭ ۇلتارالىق كەلىسىمى نىعايدى, ساياسي تۇراقتىلىعى بەكەمدەنە ءتۇستى, مەملەكەتتىڭ دامۋىنا باعىتتالعان باعدارلامالار ءساتتى جۇزەگە اسىرىلدى. وسىنىڭ ءبارى – پرەزيدەنتتىڭ سەنىمدى جەڭىسىنىڭ ايعاعى», – دەدى وبلىس اكىمى
حالىقتىڭ ەرلىگى – ەڭبەكتە, باقىتى – باۋىرمالدىعىندا, جاسامپازدىعى – جارقىن ىستەرىندە. سوندىقتان بەيبىت ومىردەگى تابىستى ءىسىمىزدى, بەرەكە-بىرلىگىمىزدى ماقتان ەتكەن مەرەكەلىك باسقوسۋ ءسۇيىنباي اتىنداعى وبلىستىق فيلارمونيا كونتسەرتتىك باعدارلاماسىمەن جالعاسىپ, جالپىحالىقتىق مەرەكەمەن ۇلاستى.
نۇربول الدىباەۆ,
«ەگەمەن قازاقستان».
تاراز
قازاقستان حالقىنىڭ بىرلىگى كۇنى مەرەكەسى ەلىمىز تاۋەلسىزدىك العان جىلداردان بەرى جاڭاشا سيپاتقا يە بولدى. ويتكەنى, بىرلىك پەن ىنتىماق, دوستىق پەن تۋىسقاندىق بۇگىندە كوپۇلتتى قازاقستاننىڭ قارقىندى دامۋىنىڭ كەپىلى. بيىل قازاقستان حالقى اسسامبلەياسىنىڭ 20 جىلدىعىنىڭ ەلىمىزدە كەڭ كولەمدە اتاپ ءوتىلۋى ەلدىگىمىزدىڭ قالىپتاسۋى مەن تاۋەلسىزدىگىمىزدىڭ نىعايۋ تاريحىندا ايرىقشا ءرول اتقارۋدا. ال, كەشەگى سايلاۋدا ەلباسى مەرەيىنىڭ ۇستەم بولۋى كوپ ۇلتتى حالقىمىزدىڭ ەلباسىنا دەگەن ىستىق ىقىلاسى, شەكسىز قۇرمەتىنىڭ كورىنىسى ەكەنى انىق. «تاتۋ ەلدىڭ شىعار تاۋى بيىك» دەگەن مىنە, وسى بولسا كەرەك.
«بۇل كۇن – حالىق اراسىنداعى دوستىقتىڭ بەلگىسى, ءوزارا باۋىرماشىلدىق پەن تۇسىنىستىكتىڭ نىشانىنا اينالعان مەرەيلى مەيرام. ءبىزدىڭ ءبىرتۇتاس حالقىمىزدىڭ داستۇرىنە ەنىپ, بەيبىتشىلىك پەن ءوزارا سىيلاستىقتىڭ سيمۆولىنا اينالدى. الدىمىزدا مەملەكەت باسشىسى بەلگىلەگەن «ءماڭگىلىك ەل» ۇلتتىق يدەياسى مەن «قازاقستان-2050» ستراتەگياسىن, «نۇرلى جول» باعدارلاماسى مەن بەس حالىقتىق رەفورمانى ورىنداۋ ماقساتتارى تۇر. مۇنىڭ بارلىعى دا تاعدىرى ءبىر, وتانى ءبىر حالقىمىزدىڭ كەلەشەگى, ۇرپاعىمىزدىڭ بولاشاعى ءۇشىن جاسالۋدا. جامبىلدىقتار دا بارشا قازاقستاندىقتار سياقتى ۇلى ماقساتتارعا قول جەتكىزۋ جولىندا جۇمىلا ەڭبەك ەتەتىنىنە سەنىمدىمىن», – دەدى اۋليەاتالىقتاردى قۇتتىقتاعان جامبىل وبلىسىنىڭ اكىمى كارىم كوكىرەكباەۆ.
بىرلىك پەن ىنتىماقتىڭ المايتىن قامالى, شىقپايتىن شىڭى, اسپايتىن اسۋى جوق. ايتۋلى مەرەكەنى جامبىلدىقتار كوتەرىڭكى كوڭىل-كۇيدە اتاپ ءوتىپ, تاراز قالاسىنىڭ «دوستىق» الاڭىندا وتكەن مەرەكەلىك شەرۋدىڭ سوڭى ۇلتتىق جانە سپورتتىق ويىندار, ونەر مايتالماندارىنىڭ كونتسەرتى مەن كوپشىلىك سەرۋەنگە ۇلاستى. ونەر ءاربىر ۇلتتى ءبىر-بىرىنە جاقىنداستىراتىن, تەڭەستىرەتىن قۇدىرەتتى كۇش قوي. سوندىقتان دا مەرەكەدە ايتىلعان, ءتۇرلى تىلدە ايتىلعان ءاندى دە, ءتۇرلى ۇلتتار بيلەگەن ءبيدى دە ەشكىم جاتىرقاعان جوق. قايتا كوپتىڭ كوڭىلى دوستىقتىڭ ارناسىندا توعىستى. مەرەكە كەشكىلىك ونەر جۇلدىزدارىنىڭ كونتسەرتىنە ۇلاسىپ, جاستار ءوزارا بي جارىستىردى.
ورالحان ءداۋىت,
«ەگەمەن قازاقستان».
سۋرەتتى تۇسىرگەن
التىنبەك قارتاباي.
شىمكەنت
1 مامىر – قازاقستان حالقىنىڭ بىرلىگى كۇنى مەرەكەسى شىمكەنتتەگى جاڭا اكىمشىلىك-ىسكەرلىك ورتالىعىنىڭ الاڭىندا ءوتتى.
وڭتۇستىكتە بىرلىگى جاراسقان, ءبىر ءۇيدىڭ بالاسىنداي, ءبىر قولدىڭ سالاسىنداي 100-دەن استام ۇلت پەن ۇلىستىڭ وكىلدەرى تۇرادى. سالتاناتتى مەرەكەدە ولار شەرۋ تارتىپ, ۇلتتىق اۋەندەر سارىنىمەن الاڭعا ءوتتى. مىنبەگە ۇلتتىق-مادەني ورتالىقتاردىڭ توراعالارى شاقىرىلىپ, وبلىس اكىمى اسقار مىرزاحمەتوۆ جۇرتشىلىقتى مەرەيلى مەرەكەمەن قۇتتىقتادى.
تاريحتىڭ قاي پاراعىن اشساڭ دا ەلدىڭ اڭساعان ماقسات-مۇراتى بەيبىتشىلىك بولعاندىعىن, قازاقستان تاۋەلسىزدىك العاننان بەرى ەلباسى وسى ۇلى مۇرات جولىندا تالماي جۇمىس جاساپ كەلە جاتقاندىعىن, بۇگىنگى مەملەكەتتىك ساياساتتىڭ تۇپقازىعى ەل بىرلىگى ەكەندىگىن ايتقان وبلىس باسشىسى بۇعان وڭتۇستىكقازاقستاندىقتاردىڭ دا ايتۋلى ۇلەس قوسقاندىعىنا توقتالدى. ونىڭ ايقىن دالەلى رەتىندە كەشەگى پرەزيدەنتتىك سايلاۋدا حالىقتىڭ تىلەگى ءبىر ارنادان توعىسىپ, قازاقستان حالىقتارىنىڭ ىنتىماقتاستىعى الەمگە ءماشھۇر بولعاندىعىن, تونىكوك بابا زامانىنان امانات بولعان ماڭگىلىك ەل مۇراتىنا بىرگە جەتەتىندىگىن ايتتى.
قازاقستان حالقى اسسامبلەياسى جىلىن مەرەكەلەۋ اياسىندا ەل بىرلىگىن نىعايتۋعا, مادەنيەتارالىق ۇنقاتىسۋدى دامىتۋعا جانە قازاقستاندىق پاتريوتيزمدى قالىپتاستىرۋعا قوسقان ەلەۋلى ۇلەسى ءۇشىن تولەبي اۋدانى «تاعاينا» جالپى ورتا مەكتەبىنىڭ ديرەكتورى كاديروۆ وسمانالي, وڭتۇستىك قازاقستان مەملەكەتتىك پەداگوگيكالىق ينستيتۋتىنىڭ دوتسەنتى كۋربانوۆ اگاپاشا, م.اۋەزوۆ اتىنداعى وڭتۇستىك قازاقستان مەملەكەتتىك ۋنيۆەرسيتەتى كافەدراسىنىڭ مەڭگەرۋشىسى ناديروۆ كازيم, ءتۇركىستان قالاسىنداعى ديزاينەرلەر وداعىنىڭ مۇشەسى حاماركۋلوۆ ناسىر «ءبىرلىك» التىن مەدالىمەن ماراپاتتالدى.
سونداي-اق, ءبىر توپ ازاماتقا ۇلتارالىق بىرلىككە سىڭىرگەن ەڭبەگى ءۇشىن «قازاقستان حالقى اسسامبلەياسىنا – 20 جىل» مەرەكەلىك مەدالى تابىس ەتىلدى.
بىرلىك كۇنى وبلىستىڭ قوعامدىق-ساياسي ومىرىنە بەلسەنە قاتىسقانى, دوستىق پەن ۇلتارالىق كەلىسىمدى نىعايتۋعا قوسقان ەلەۋلى ۇلەسى ءۇشىن وبلىستىق ەتنومادەني بىرلەستىكتەرگە وبلىس اكىمىنىڭ گرانتى تابىس ەتىلدى.
ەتنومادەني ورتالىقتاردىڭ اتىنان ە.رومانوۆا مەن ي.حاشيمجانوۆ ءسوز الىپ, ماڭگىلىك ەل مۇراتى بولعان وتانىمىزدىڭ بۇگىنى مەن كەلەشەگى كەمەل ەكەندىگىن ايتىپ, مەرەكەگە جينالعان جۇرتتى قۇتتىقتادى. انمەن, كۇيمەن استاسقان مەيرام وڭتۇستىكتە وسىلايشا اتالىپ ءوتىلدى.
باقتيار تايجان,
«ەگەمەن قازاقستان».
